Sonila Mesareja
Pas shpërthimit në rajonin e policisë
Operacioni “Detonatori”, dyshohet se tritoli ishte i destinuar për tregun e brendshëm kriminal që operon në Qarkun e Durrësit
Një sasi e konsiderueshme tritoli, rreth 25 kg, është sekuestruar gjatë orëve të para të mëngjesit të djeshëm, ndërsa u vunë në pranga poseduesit e saj, në të njëjtën kohë edhe të dyshuar si autorë të shpërthimit të tretë të ndodhur dy netë më parë në rajonin e policisë së Fushë Krujës. Arrestimi i tyre ka ndodhur vetëm pak orë pas shpërthimit të ndodhur në rajon, ndërsa një prej katër të dyshuarave si të implikuar, ishte duke transportuar sasinë e tritolit, të ndarë në 100 kallëpe tritoli. Sipas policisë, sasia e tritolit ishte e destinuar për tregun e brendshëm kriminal që operon në Qarkun e Durrësit. Policia bën me dije se i katërti u kap i fshehur në një stan ndërsa një tjetër është shpallur në kërkim dhe po punohet për kapjen e tyre. Uniformat blu kanë vënë në pranga Dorjan Picorri, 28 vjeç, Saimir Ajazi, 34 vjeç, Redi Ndreu 30 vjeç, dhe Enis Mullai, 31 vjeç, të katër nga Kruja.
Operacioni
Pak orë pas shpërthimit në rajonin e policisë së Fushë Krujës, Policia e Durrësit ka rënë në gjurmët e autorëve të dyshuar. Në kuadër të operacionit të koduar “Detonatori”, i cili u finalizua mëngjesin e djeshëm rreth orës 05:00, policia bëri të mundur arrestimin e 3 personave, fillimisht Dorjan Picorri, 28 vjeç, Saimir Ajazi, 34 vjeç, si dhe Redi Ndreu 30 vjeç, të tre nga Kruja. Disa orë më pas, është arrestuar edhe personi i katërt i dyshuar për shpërthimin e tretë në rajonin e policisë së Fushë-Krujës. Enis Mullai, 31 vjeç, edhe ky nga Kruja, i cili u gjet i fshehur në brendësi të një stani bagëtish, në zonën e Zaharisë. Në kërkim është edhe një person tjetër. Sipas policisë së Durrësit nga hetimet e deritanishme rezulton se anëtarët e këtij grupi janë përgjegjës për shpërthimin e dy netëve më parë me eksploziv në portën e pasme të rajonit të policisë në Fushë-Krujë. Nga ky operacion, sektori Kundër Narkotikeve dhe Trafiqeve të Paligjshme Durrës ka sekuestruar një sasi prej 100 kallëpe lënde plasëse të llojit tritol. Sipas policisë, sasia e tritolit ishte e destinuar për tregun e brendshëm kriminal që operon në Qarkun e Durrësit.
Hetimi
Burime zyrtare të policisë së Durrësit bëjnë me dije se kapja e personave të dyshuar si autorë të shpërthimeve të ndodhura në komisariatin e Fushë Krujës u bë e mundur falë një hetimi 1-mujor të Prokurorisë së Krimeve të Rënda në bashkëpunim me strukturat policore. Këto struktura mësohet se po hetonin mbi veprimtarinë kriminale të trafikut të lëndëve plasëse në këtë zonë. Nga hetimet e ndërmarra deri tani rezulton se anëtarët e këtij grupi kriminal të kapur me 100 kallëpe tritoli, të arrestuar mëngjesin e djeshëm, dyshohen si autorë të mundshëm edhe të shpërthimit te ndodhur dy netë më parë në Stacionin e Policisë Fushë Krujë. Nga ana e grupit hetimor vijon puna për dokumentimin e plotë të aktivitetit të këtij grupi si dhe implikimin e tyre në ngjarje të ndodhura në Qarkun e Durrësit me përdorim të lëndëve plasëse. Sipas të njëjtave burime, fillimisht u bë kapja në flagrancë dhe më pas arrestimi në orën 05.00 të mëngjesit të djeshëm e shtetasit Dorjan Picorri, 28 vjeç, lindur ne Krujë e banues i përkohshëm në Tiranë, të cilit iu kap edhe sasia e konsiderueshme lënde plasëse e llojit tritol. Disa orë më vonë, u realizua edhe kapja e shtetasit Saimir Ajazi, 34 vjeç, lindur ne Krujë e me banim të përkohshëm në Tiranë. Pas tyre u kapën edhe Redi Ndreu dhe Enis Mullai, edhe këta nga Kruja, të dyshuar si pjesë e këtij grupi kriminal. Grupi hetimor bën me dije se 100 kallëpet e tritolit dyshohet të jenë të destinuara për tregun e brendshëm kriminal që operon në Qarkun e Durrësit. Materialet proceduriale iu përcollën Prokurorisë për Krimet e Rënda Tiranë për veprën penale “Trafikim i lëndëve plasëse, djegëse, helmuese e radioaktive në bashkëpunim”, neni 282/a dhe 25 të Kodit Penal.
Itali
Vrasja e Ziberit, nën hetim 9 familjarë të autorit Nikaj
Paulin Nikaj nuk është i vetmi i dyshuar për vrasjen e emigrantit Nimet Ziberi, pasi edhe 9 familjarë të tij janë nën hetim për bashkëpunim në këtë krim. Faktet e reja bën me dije nga mediat italiane, sipas të cilave dyshohet që familjarët e Paulin Nikaj të kenë ndihmuar në krimin e datës 24 mars 2014 në parkingun e supermarketit “Conad” në Misano. Vrasësi vetë u gjurmua duke ikur nga Zvicra për në Shtetet e Bashkuara, por tani policia italiane ka nxjerrë dhe nëntë urdhra ndalimi për të afërmit e Paulin Nikajt, që e kanë ndihmuar atë për t’u arratisur, duke nisur që nga xhaxhai, gruaja, kushërinjtë, etj. Sipas mediave italiane, të cilët i referohen grupit hetimor, autori i vrasjes, për t’u arratisur, kishte kërkuar së pari mbështetjen e të afërmve të gruas së tij dhe më pas ka shkuar në shtëpitë e disa kushërinjve. Burimet policore bëjnë me dije se të nëntë janë identifikuar dhe po përballen me akuzën e mbështetjes së një vrasësi në krim. Po sipas mediave italiane, duket që e donin shumë familjarët djalin e vetëm të fisit “Nikaj”, i mbetur i vetëm pas vdekjes së nënës, e cila e ka lënë në moshë të vogël. Kështu kanë bërë edhe kur ai djali i vogël, tashmë i rritur, u përfshi në një krim të rëndë. Paulin Nikaj është rritur nga një daja i tij në Misano dhe dyshohet se ai ka qenë një nga personat që ka mbuluar ikjen e tij nga Italia pas krimit. Fillimisht te xhaxhai, pastaj te disa të afërm në Bergamo dhe më pas nga aty dhe në Zvicër. Ata u përpoqën që të mos bënin asnjë hap flas që të mund t’u dështonte plani i largimit nga Italia të të dashurit të tyre, derisa u bë arrestimi i Nikaj në Bernë të Zvicrës.
