Gëzim Saliu
Vendimi për ndalimin e së drejtës së komunave për të dhënë leje ndërtimi. Përfaqësuesja e ekzekutivit: Pezullimi është i përkohshëm, nuk kemi shkelur ligjin
Gjykata Kushtetuese shqyrtoi dje ankimimin e komunave Farkë dhe Kashar që kërkojnë shfuqizimin e vendimit të Këshillit të Ministrave dhe Këshillit Kombëtar të Territorit të datës 18 dhjetor të vitit 2013 që u heq këtyre dy komunave të drejtën për të dhënë leje ndërtimi. Sipas përfaqësuesit ligjor të dy komunave, Ivi Kaso, qeveria me vendimin e saj ka uzurpuar kompetencat e qeverisjes vendore. Ndërkohë, përfaqësuesit e ekzekutivit theksuan se vendimi është i përkohshëm deri në miratimin e Planit të Përgjithshëm Kombëtar.
Debati
Në fjalën e tij para trupës gjykuese të Kushtetueses, Kaso kërkoi shfuqizimin e vendimit si antikushtetues dhe që bie ndesh me kartën evropiane të autonomisë vendore. “Organet e qeverisjes qendrore kanë uzurpuar një kompetencë dhe kanë ushtruar në mënyrë abuzive një kompetencë të organeve të qeverisjes vendore. Në këtë kontekst ne kërkojmë pranimin e padisë”, – deklaroi përfaqësuesi ligjor i komunave Kashar dhe Farkë. Ndërkohë, në kundërshtim me këtë pretendim, përfaqësuesit e Këshillit te ministrave dhe të Këshillit Kombëtar të Territorit, thanë se pezullimit është i përkohshëm deri në miratimin e Planit të Përgjithshëm Kombëtar. “Mendojmë që është vepruar në përputhje të plotë me ligjin. Mos veprimi i shkuar është i dënueshëm dhe veprimi aktual është i vlerësueshëm e ndaj ne kërkojmë rrëzimin e kërkesës”, – theksoi përfaqësuesja e ekzekutivit. Në vendimin e Këshillit Kombëtar të Territorit përcaktohet pezullimi i dhënies së të gjitha llojeve të lejes zhvillimore në zonat e kurorës së Tiranës, nga autoritetet e planifikimit deri në miratimin e Planit të Përgjithshëm Kombëtar. Ky vendim ndalon 6 komuna të japin leje ndërtimi në zonat që janë cilësuar si me karakter strategjik për zhvillimin dhe rehabilitimin e vendit. Ndërkaq në padinë e tyre në Kushtetuese, komunat kërkojnë zgjidhjen e mosmarrëveshjes së kompetencave ndërmjet qeverisjes vendore dhe pushtetit qendror. “Shqyrtimin e pajtueshmërisë me Kushtetutën dhe me Kartën Evropiane të Autonomisë Vendore si dhe shfuqizimin si antikushtetues, si akte që bëhen shkak për lindjen e konflikti, të: Vendimit nr. 1, datë 8.10.2013 të Këshillit Kombëtar të Territorit “Për masat emergjente të ndërhyrjes mbrojtëse dhe rehabilituese mjedisore në disa zona me rëndësi kombëtare dhe procedurën e hartimit të Planit të Integruar Sektorial për Brezin Bregdetar”; vendimi nr. 3, datë 18.10.2013 të Këshillit Kombëtar të Territorit “Për masat emergjente të ndërhyrjes mbrojtëse dhe rehabilituese në zonën me rëndësi të veçantë të Kurorës së Tiranës”. Pezullimin e vendimit nr. 1, datë 8.10.2013 dhe vendimit nr. 3, datë 18.10.2013 të Këshillit Kombëtar të Territorit, deri në përfundimin e shqyrtimit nga Gjykata Kushtetuese”, – thuhej në kërkesë.
Debati me Dodën/ Përçahet greva e ish-të përndjekurve, Kaziu tenton të vetëdigjet në emision
Pavarësisht se kishin deklaruar mbajtjen e një greve 24-orëshe, ish-të përndjekurit u përçanë dje mes tyre në protestën e zhvilluar para Parlamentit. Ndërhyrja e deputetëve të PD-së, Mesila Doda dhe Voltana Ademi, ka ndarë palët në qëndrimet e tyre, ku një pjesë ka mbështetur ligjvënëset demokrate në deklaratat para oborrit të Parlamentit, ku brenda zhvillohej seanca me debate mes palëve për çështje të rendit të ditës, e ndërkohë disa të tjerë kanë kundërshtuar prezencën e tyre. Përkatësisht debatin kryesor gjatë deklaratës së saj deputetja Doda e zhvilloi me një prej pjesëmarrësve, i cili iu kundërvu ashpër asaj, duke u shprehur: “Pse keni ardhur këtu?! Ikni! Nuk jemi pjesë e politikës. Ke qenë në pushtet, më thuaj ti çfarë i ke dhënë kësaj shtrese”. Nga ana e saj, deputetja demokrate fill pas debatit dhe përplasjeve për prezencën e saj në protestë, ka reaguar në rrjetin social “Facebook”, ku e cilësoi aktin si larg çdo caku mirësjellje apo qytetari. Më tej ajo publikoi një dokument mbi personin që e sulmoi me fyerje gjatë grevës së ish-të përndjekurve politikë. Sipas saj, personi nuk ka vuajtur dënim për politikë në kohën e komunizmit, por për veprën penale të përdhunimit. “Në këtë vërtetim shihet qartë dënimi për arsye ordinere dhe vepra të rënda siç është përdhunimi. I bëj thirrje të burgosurve politike të distancohen menjëherë nga individë me vepra të tilla të rënda penale dhe të luftojnë për të drejtat e tyre dhe për integrimin e tyre të plotë”, – shkruante Doda. Ndërkaq pas thirrjes që i bënë një pjesë e ish të përndjekurve që vijuan protestën para institutit të të Përndjekurve, e cila u mbyll rreth orë 20:30, deputetja Mesila Doda ka shkuar sërish pranë tyre, ku tha: “Të hapen dosjet. Ne jemi për tu vendosur në vend e drejta e të dënuarve politikë. Mos u bashkoni me të dënuar ordinerë”. Ndërsa përfaqësuesit e ish të përndjekurve bënë me dije se personi që i foli ashpër deputetes nuk ishte ish i përndjekur. Në mbyllje të protestës, një prej ish-të përndjekurve, Fatmir Hoxha paralajmëroi përshkallëzim e saj, duke kërkuar nga qeveria marrjen e masave. “Nëse nuk mbajnë fjalën e dhënë do ketë protesta në të gjithë Shqipërinë. Ne nuk pranojmë të na drejtojnë ordinerët. Të zbatohet ligji që vetë kanë miratuar. Të vijë të solidarizohet me ne Ambasadori Amerikan”.
Debati
Ndërkohë, në një intervistë direkte në televizionin “News 24”, ish-i përndjekuri politik Kujtim Kaziu në debat e sipër nxori nga xhepi i xhupit një shishe me benzinë dhe kërcënoi se do ndërmarrë akt ekstrem për indiferencën e shtetit përballë çështjes së të burgosurve politikë. Një prej moderatorëve në studio, tentoi ti marrë shishen me benzinë, ndërsa regjia ndërpreu transmetimin deri në qetësimin e situatës. Veprimi i Kaziut erdhi pas një debati mbi përplasjen që ish të përndjekurit patën në protestën e ditës së djeshme, ku vlen të theksohet se akt i djeshëm ishte tentativa e dytë e tij për t’u vetëdjegur në transmetimin direkt. Para pak ditësh, Kaziu tentoi të vetëdigjej duke hedhur mbi vete benzenë gjatë një prononcimi direkt në TV në protestën e kaluar të të ish-të përndjekurve politikë, por ndërhyrja në kohë e policisë e shpëtoi atë.
Takimet në SHBA/ Mediu: Opozita, pro integrimit pa kushte, qeveria veprime antikushtetuese
Kryetar i Partisë Republikane, Fatmir Mediu, në kuadër të një vizitë zyrtare në SHBA, zhvilloi takime në Kongres me senatorë dhe kongresmenë, ku u diskutua situata aktuale politike dhe roli i opozitës. Gjatë vizitës në SHBA, Mediu u takua me senatorët James Inhofe dhe Roy Blunt, kongresmenin Robert Aderholt, zv.president i Asamblesë Parlamentare të OSBE dhe bashkëkryetar i Grupit për Shqipërinë në Kongresin e SHBA-së. Në këto takime kreu i PR-së vuri në dukje se mbas zgjedhjeve të qershorit fatkeqësisht, qeveria socialiste dhe LSI, në mënyrë konsistente janë përpjekur dhe po përpiqen të uzurpojnë Institucionet Kushtetuese dhe t’i përdorin ato politikisht. “Gjykata Kushtetuese ka marrë vendime të njëpasnjëshme kundër vendimeve të mazhorancës, të cilat kanë qenë tërësisht antiligjore dhe antikushtetuese”, – ka theksuar ai. Më tej, Mediu ka pohuar: “Çështjet e sigurisë, janë të një rëndësie parësore për të dy vendet si anëtare të NATO, por dhe në kuadër të luftës kundër terrorizmit dhe krimit të organizuar. Politizimi i Institucioneve, prishja e parimeve kushtetuese të Check and Balance, krijon probleme të pakthyeshme në garantimin e sigurisë dhe ruajtjen e rendit publik”. Nga ana tjetër, kreu i PR-së shprehu vendosmërinë e opozitës për të mbështetur procesin e integrimit, duke nënvizuar njëkohësisht vendimet antiligjore të qeverisë. “Opozita mbështet pa mëdyshje rrugën evropiane dhe marrjen e statutit të vendit kandidat, por dhe kërkon njëkohësisht nga qeveria të ndale veprimet antikushtetuese dhe antiligjore. Ne do kryejmë detyrimet tona si opozitë për të garantuar transparencën në përputhje me autoritetin që na jep Kushtetuta në parlament”, – pohoi Mediu.
