Ambasada e Shteteve të Bashkuara të Amerikës, me anë të një deklarate për mediat, ka deklaruar se “mirëpret vendimin e deputetit Arben Ndoka për t’u dorëhequr nga Parlamenti dhe vendimin për të lejuar arrestimin e deputetit Armando Prenga”. “Këto vendime përfaqësojnë përparim të mirëfilltë për Shqipërinë, drejt krijimit të një sistemi politik me drejtues të standardeve më të larta etike”, – theksohej në deklaratën e Ambasadës së SHBA-së. Kjo e fundit është treguar mjaft e ashpër në reagimet e saj lidhur me çështjen e dekriminalizimit, duke theksuar se është e turpshme që Parlamenti të jetë i mbushur me persona me rekorde kriminale.
