Ndërkohë në aksin Levan-Tepelenë, furgoni del nga rruga, 1 i vdekur dhe 2 të plagosur
Vetëm brenda ditës shënohen dy aksidente me dy viktima dhe tre të plagosur. Rasti i parë është shënuar në orët e para të ditës në Durrës, ku dy të mitura kanë tentuar të kalojnë rrugën për të vajtur në shkollë. Fatkeqësisht, automjeti ka përplasur vajzat dhe viktimë ka mbetur një 7-vjeçare. Fatmirësisht, ka arritur të shpëtojë vajza tjetër 4-vjeçare, e cila ndodhet e shtruar në spital. Burime nga policia bëjnë të ditur se ngjarja ka ndodhur rreth orës 08:15 në qendër të fshatit Armath në Maminas, ku vajzat janë përplasur nga një makinë, rrugës për në shkollë teksa ishin duke kaluar nga njëra anë e rrugës në tjetrën. Të miturat janë dërguar menjëherë në spital, por njëra prej tyre, e identifikuar si S. Nano, nuk ka mundur të mbijetojë, për shkak të plagëve të rënda. Ndërkohë, vajza tjetër, 4 vjeçe, po merr mjekimin e nevojshëm në spitalin e Durrësit dhe fatmirësisht është jashtë rrezikut për jetën. Burime nga vendi i ngjarjes bëjnë të ditur se vajzat i kanë prerë rrugën makinës dhe drejtuesi i mjetit nuk ka mundur të shmangë përplasjen. Ndërkohë, policia ka ndaluar drejtuesin e mjetit, 30-vjeçarin Bledar Musta, i cili mësohet se është banor i fshatit. Nga ana tjetër, një person ka vdekur dhe dy të tjerë kanë mbetur të plagosur në një aksident në segmentin Levan – Tepelenë. Ngjarja e rëndë ka ndodhur rreth orës 17:20 në fshatin Varibobë pranë Fierit. Sipas policisë, furgoni me targë AA189DT, me të cilin po udhëtonin tre personat, është përplasur fillimisht me një autoveturë dhe më pas me bordurën, pasi i ka plasur goma. Në autoveturën me targë IEY5299 udhëtonin katër persona, të cilët nuk kanë pësuar dëmtime. Ndërkohë, policia e Fierit bën me dije se viktima është Qazim Aliaj, 25 vjeç, ndërsa kanë mbetur të plagosur Leonard Aliaj dhe Myfteak Zylalaj. Uniformat blu kanë mbërritur menjëherë në vendin e ngjarjes dhe ka nisur hetimet për zbardhjen e plotë të shkaqeve të aksidentit.
Dosja “Gjika”/ Dëshmitarët: Kërkesat për leje ndërtimi nuk u shqyrtuan nga ana teknike
Gjykata e Tiranës, në procesin gjyqësor ndaj kryetarit të Bashkisë së Vlorës, Shpëtim Gjika, vazhdoi me pyetjen e dëshmitarëve të akuzës. Në sallën e gjyqit dha versionin e tij inxhinieri Dorian Hurdha, ish-drejtori i Planifikimit Urban në Bashkinë e Vlorës. Ndër të tjera ai tha se kërkesat për lejet apo sheshe ndërtimi në Bashkinë e Vlorës gjatë periudhës 2010-2012 janë shqyrtuar direkt në Këshillin e Rregullimit të Territorit pa kaluar më parë për shqyrtim teknik. Kjo metodë, sipas inxhinierit Hurdha, ka ndodhur disa herë, pasi këshilli teknik jep vetëm vlerësim konsultativ dhe nuk mund të marrë vendime. Ai u shpreh se ka pasur raste që kërkesat për leje dhe shesh-ndërtime bëheshin direkt në mbledhje nga kryetari apo anëtarët e Këshillit Bashkiak. Më pas, seanca u shty për mosparaqitjen e dëshmitarëve të tjerë të akuzës, duke u caktuar data 28 prill për t’u pyetur dëshmitarët Dheolloraq Pashaj, Ilir Troci dhe Eduart Meminaj.
