Gjenerali në pension ka përdorur uniformën ushtarake të gjeneralit në 5-vjetorin e NATO-s
Kandidatura e Arjan Zaimit si shef i Zyrës së Përfaqësimit të Shqipërisë në NATO nuk pranohet nga Presidenti i Republikës Bujar Nishani. Kreu i shtetit, sipas burimeve pranë Presidencës, ka refuzuar të dekretojë kandidaturën e propozuar nga ministrja e Mbrojtjes Mimi Kodheli, pasi nuk përmbush standardet e kërkuara nga Nishani për postin në NATO. Po ashtu, në motivacionin e tij për kundërshtimin e Zaimit, Presidenti ka patur parasysh edhe përdorimin e gradave në kundërshtim me ligjin. Gjenerali në pension ka përdorur uniformën ushtarake të gjeneralit, në të paktën dy ceremoni publike, ku e fundit ishte ajo për 5-vjetorin e pranimit të Shqipërisë në NATO. Pavarësisht se me dekret të Presidentit, Zaimi ka dalë në lirim para disa viteve, ai mban aktualisht postin e Këshilltarit Ushtarak të ministres së Mbrojtjes. Ky rast i fundit duket i ngjashëm me akuzat e qeverisë dhe ministres së Mbrojtjes për ish-kreun e misionit ushtarak në NATO, admiral Kristaq Gerveni, ku u kërkua shkarkimi dhe kthimi i menjëhershëm në atdhe.
Rasti i Gervenit
Pak kohë më parë, ministrja e Mbrojtjes, Mimi Kodheli, i kërkoi Presidentit Bujar Nishani, përmes një shkrese zyrtare, lirimin nga detyra të kundëradmiral Kristaq Gervenit. Kërkesa ishte me argumentin ka qenë shkelja e ligjit nga ana e kundëradmiralit, i cili në një takim të 170 shefave të Mbrojtjes të vendeve të NATO-s dhe atyre partnere, të zhvilluar në Bruksel, ka mbajtur uniformën e gradës “Admiral”, ku grada “Kundëradmiral”, thuhej në letër, sipas rregullores, është ideuar me një vizë të trashë dhe një të hollë me sfond në ngjyrë të verdhë. Në kundërshtim me qëndrimin e presidentit, i cili refuzoi zëvendësimin e Gervenit, ministrja Kodheli deklaroi se dekretit të kreut të shtetit i kishte përfunduar afati, ndaj dhe zëvendësimi i Admiralit ishte në respektim të procedurave ligjore. Pavarësisht pretendimeve të kreut të shtetit për shkelje të kompetencave me këtë vendim, ministrja Kodheli kishte pohuar se nuk bëhej fjalë për shkelje të kompetencave por sipas saj Gervenit i kishte përfunduar mandati. Ndërkohë Gjykata Administrative pezulloi rreth dy javë më parë urdhrin e ministres Kodheli për shkarkimin e kundëradmiralit Kristaq Gerveni. Ky vendim do qëndrojë në fuqi derisa të përfundojë gjykimi në themel i çështjes, ku atasheu ushtarak në NATO kërkoi nga gjyqësori të shfuqizojë dhe ta konsiderojë të pavlefshëm aktin administrativ të ministres së Mbrojtjes. Marrëdhëniet mes kreut të shtetit dhe mazhorancës kanë kohë që janë të acaruara, ku përplasjet e para nisën që kur qeveria Rama që në mbledhjen e saj të parë në shtator, fill pas betimit te Presidenti, vendosi të hiqte foton e tij nga zyrat e Shtetit. Po ashtu rrëzimi i dy kandidaturave për Gjykatën e Lartë si edhe kritikat ndaj tij nga ministri i Brendshëm lidhur me çështjen e SHISH janë pjesë e këtij konflikti të hapur që vazhdon prej muajsh.
Në tregun e brendshëm/ Qeveria merr sot borxh tre miliardë lekë, shlyerja për 10 vite
Qeveria merr borxhin e radhës tek qytetarët e saj. Ministria e Financave bëri të ditur se sot do të zhvillohet ankandi i obligacioneve 10-vjeçare në Bankën e Shqipërisë, ku në total, qeveria do kërkojë të marrë në tregun e brendshëm 3 miliardë lekë, me synimin për t’u përqendruar në borxhin afatgjatë. Në këtë rast, borxhi do të merret me një afat të gjatë, prej 10 vitesh, ku qeveria po emeton obligacione me afat 10 vjeçar, që ofrohet në dy variante, me interes fiks dhe të ndryshueshëm. Shuma e përgjithshme për interesat fikse është 2 miliardë lekë, ku interesi i ofruar nga Ministria e Financave do të jetë 9.15% dhe do të paguhet çdo gjashtë muaj, përkatësisht në datën 25 tetor dhe 25 prill. Ndërkohë, ankandi 10 vjeçar me kupon të ndryshueshëm kërkon një shumë të përgjithshme prej 1 miliard lekësh. Kuponi do të paguhet çdo 6 muaj, përkatësisht në datën 25 tetor dhe 25 prill. Qeveria gjithmonë e më shumë po kërkon borxh në tregun e brendshëm, por ajo po përqendrohet tek borxhi me afat të gjatë, për të ulur rrezikun e ripagimit të tij. Fakt ky i vënë në dukje së fundmi dhe nga Fondi Monetar Ndërkombëtar në një raport për Shqipërinë.
Mosdeklarimi i pasurisë/ ILDKP gjobit zv.ministrin e Mbrojtjes Hila dhe deputetin e PS-së Rakip Suli
Inspektorati i Lartë i Deklarimit dhe Kontrollit të Pasurive dhe Konfliktit të Interesave gjobit me 50.000 lekë zv.ministrin e Mbrojtjes, Dritan Hila dhe deputetin socialist Rakip Suli për mosdeklarim të pasurisë. Pas shqyrtimit të akteve të deklarimit të interesave private të subjektit deklarues Dritan Hila, Inspektorati i Përgjithshëm konstatoi: “Në zbatim të nenit 5/1, pika 2 e ligjit nr. 9049 “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, i ndryshuar, duhej të kishte paraqitur deklaratën e interesave private “Para Fillimit në Detyrë”, brenda 30 ditëve nga data emërimit në detyrë. Nga aktet e administruara rezulton që Z. Hila është emëruar në detyrën e zv.ministrit më datë 4.10.2013”. Po ashtu Inspektori i Përgjithshëm, pas shqyrtimit të akteve të deklarimit të interesave private të subjektit deklarues Rakip Suli, konstatoi që në zbatim të nenit 7, pika 3 e ligjit nr.9049, ai duhej të paraqiste deklaratën e interesave private periodike/vjetore, brenda datës 31 mars 2014. Në këtë kontekst, ILDKP thekson se në kundërshtim me kërkesat ligjore, subjektet deklaruese, zv.ministri Dritan Hila dhe deputeti socialist Rakip Suli, nuk kanë dorëzuar në këtë institucion dhe pranë strukturës përgjegjëse në institucionin e tyre deklaratat e interesave private. “Në funksion të ndjekjes së një politike ndëshkuese ndaj të zgjedhurve dhe nëpunësve publikë, Inspektori i Përgjithshëm vendosi aplikimin e masës administrative me gjobë në shumën prej 50.000 (pesëdhjetë mijë) lekë për z. Dritan Hila dhe z. Rakip Suli, si dhe në zbatim të dispozitave ligjore vuri në dijeni institucionet eprore”, – bëri të ditur ILDKPI.
