Anxhela Tato
Efektivi i mori lekët të prangosurit Klodjan Nivaku, donte të trafikonte për prostitucion A. Sh.
Denoncimi në polici nga babai i vajzës së zhdukur, dyshonte se e bija kishte rënë pre e mashtrimit
Mori 50 euro në këmbim për të kaluar në pikën doganore një vajzë, e cila dyshohet se do të trafikohej për prostitucion në Itali, bie në pranga polici. Punonjësi i policisë kryeinspektor Artan Telha, 42 vjeç, është arrestuar në flagrancë nga strukturat e Shërbimit të Kontrollit të Brendshëm Elbasan. Nga të dhënat e bluve mësohet se rreth orës 05:00 të mëngjesit të djeshëm i arrestuari ka ndihmuar shtetasin Klodjan Novaku të kalojë nga Shqipëria për në Itali së bashku me shtetasen A. Sh., kundrejt shpërblimit në të holla. “Punonjësi i policisë, me detyrë ndihmëskontrollor në Pikën e Kalimit Kufitar Durrës, kryeinspektor Artan Telha, 42 vjeç, lindur në fshatin Iballë të rrethit Pukë dhe banues në Durrës, u arrestua për kryerjen e elementëve të veprës penale të korrupsionit pasiv nga persona që ushtrojnë funksione publike”, – thuhet në njoftimin e bluve. Gjithashtu, është bërë arrestimi i shtetasit Klodjan Novaku, 28 vjeç, lindur dhe banues në Elbasan. Arrestimi i këtij shtetasi u krye për veprën penale të “Trafikut të të rriturve” e mbetur në tentativë dhe “Armëmbajtjes pa leje”. Nga të dhënat e policisë mësohet se ka qenë babai i vajzës 22-vjeçare, i cili ka denoncuar largimin e saj nga banesa. Ai ka shfaqur shqetësimin se personi, me të cilin mund të jetë larguar e bija, ka pasur si qëllim trafikimin e saj. Pas hetimeve të bluve është zbuluar se gjatë tentativës për kalimin e pikës doganore të Durrësit, është paguar 50 euro policit të kontrollit, i ciki mund të mos ketë qenë në dijeni për qilimin e prostitucionit.
Njoftimi
Nga të dhënat e Ministrisë së Brendshme bëhet me dije se gjatë kontrollit të banesës së këtij shtetasi është sekuestruar një armë pistoletë e tipit “Zastava”, një shumë të hollash prej 670 euro, një telefon i markës “Nokia”, pasaportë dhe kartë identiteti dhe 2 bileta udhëtimi në emër të Klodjan Novaku dhe Adile Shabani, të cilat janë sekuestruar në cilësinë e provës materiale. Fillimi i hetimeve për këtë çështje ka nisur pas kallëzimit të shtetasit R. Sh., i ati i shtetases A. Sh., i cili ka denoncuar në polici se e bija e tij është marrë me anë të mashtrimit me qëllim trafikimin e saj për prostitucion nga shtetasi Klodjan Novaku. Strukturat e sektorit të SHKB-së Elbasan dhe Sektorit për Narkotikët dhe Trafiqet në Drejtorinë e Policisë Qarkut Elbasan, pas kryerjes së të gjitha veprimeve procedurale, organizuan operacionin “Ndalimi”, duke bërë të mundur arrestimin e shtetasit Klodjan Novaku dhe punonjësit të policisë Artan Telha. Materialet iu përcollën Prokurorisë së Elbasanit dhe vazhdojnë hetimet për zbardhjen dhe dokumentimin e plotë të kësaj ngjarjeje.
Aksidentet
Krujë, makina e kreut të policisë së Lezhës plagos 2 persona
Vlorë, makina del nga rruga për shkak të shpejtësisë, 1 i vdekur dhe 2 të plagosur
Aksidentet rrugore nuk kanë të ndalur, ndërsa vetëm brenda 24 orëve bilanci është 6 persona të plagosur dhe një i vdekur. Dy ngjarje janë regjistruar gjatë mesditës në Thumanë dhe në Shkodër. Ndërsa aksidenti i tretë ka ndodhur në orën 20:45 në aksin rrugor Levan-Vlorë, ku nga shpejtësia e madhe një automjet ka dalë nga rruga. Fatkeqësisht një person ka humbur jetën dhe dy të plagosurit janë në gjendje të rëndë. Në aksidentin e parë është përfshirë automjeti i drejtorit të policisë së Lezhës, që drejtohej nga shoferi i tij. Fatmirësisht dy personat e aksidentuar ndodhen jashtë rrezikut për jetën duke marrë mjekimin e specializuar. Ndërsa në aksin rrugor Shkodër-Han i Hotit motoçikleta ka përplasur një këmbësor. Rreth orës 12:00 policia ka raportuar se makina e drejtorit të bluve të Lezhës, Niko Brahimaj ka përplasur aksidentalisht një motor në të cilin po udhëtonin dy persona. Ndërkohë personat e aksidentuar, identiteti i të cilëve nuk bëhet i ditur, janë dërguar në Spitalin e Traumës në Tiranë, ku po marrin ndihmën e nevojshme mjekësore. Mjekët bëjnë të ditur se të plagosurit janë jashtë rrezikut për jetën. Ekspertë të policia kanë nisur punën për të zbardhur shkaqet e aksidentit. Ministria e Brendshme ka dhënë detaje lidhur me aksidentin e shkaktuar nga shoferi i drejtorit të policisë së Lezhës. Sipas ministrisë mjeti që ka shkaktuar aksidentin është i drejtorit të policisë por nuk ka qenë ky i fundit që e drejtonte por shoferi i tij. Drejtori Niko Brahimaj ka qenë pasagjer në vendin e parë. Ministria sqaron se mjeti ka përplasur një motor me dy persona dhe për pasojë kanë mbetur të plagosur Ndue Marku, Dritan Dobrozi. Një aksident me pasojë plagosjen e dy personave ka ndodhur mesditën e djeshme në aksin Shkodër-Hani i Hotit. Mësohet se një motoçikletë ka përplasur një këmbësore, e cila është plagosur. Po ashtu i plagosur ka mbetur edhe drejtuesi i motoçikletës. Policia bën me dije se të dy janë transportuar në spitalin rajonal të Shkodrës, ndërsa në vendngjarja kanë nisur hetimet, për të zbardhur shkaqet e aksidentit.
Tiranë/ I shpallur në kërkim ndërkombëtar për drogë, pranga Emiljan Burbës
Policia e Tiranës ka arrestuar shtetasin Emiljan Burba, i shpallur në kërkim ndërkombëtar për trafikim të lëndëve narkotike. Sipas policisë, mësohet se “mbrëmjen e së hënës, rreth orës 20:30, nga Sektori kundër Narkotikëve dhe Trafiqeve të Paligjshme u arrit kapja e shtetasit në kërkim ndërkombëtar e Emiljan Sofo Burba, 42 vjeç, banues në Tiranë”. Kapja dhe më pas arrestimi në flagrancë i tij u krye për Ekstradim në Itali, pasi nga zyra e Interpol Tirana ky shtetas ishte person i shpallur në kërkim ndërkombëtar nga Interpol Roma, pasi Gjykata e Apelit në Torino Itali, me vendimin e datës 15.4.2014, e ka dënuar këtë shtetas me 21 vjet burgim, për veprën penale të “Trafikimit të drogës”. Materialet procedurale ju kaluan Prokurorisë, për veprime të mëtejshme ndaj tij.
Fier/ I dënuar për trafik droge, ekstradohet nga Italia
Interpoli ka kthyer dje në Shqipëri nga Italia 25-vjeçarin Roksian Zenel Plaka, nga Roskoveci i Fierit, i cili, për shkak të një vjedhjeje me dhunë, ishte shpallur në kërkim ndërkombëtar nga Gjykata e Fierit në vitin 2013. Plaka dyshohet se më datë 18 maj 2013, së bashku me Auron Hysajn, nën kërcënimin e armëve i kanë marrë makinën, telefonin dhe kartën e identitetit një qytetari. Më pas, ai është larguar për në Shqipëri ku është arrestuar dhe dje është bërë i mundur ekstradimi i tij nga Interpoli shqiptar, që ia ka dorëzuar Drejtorisë së Përgjithshme të Burgjeve.
