A ka probleme me trajtimin? Meta: Jam përballur me izolim ekstrem
Kryetari i PL, Ilir Meta ka dhënë një intervistë nga paraburgimi për emisionin “Opinion”.
Meta është pyetur nëse ka probleme me trajtimin, deklaratës së Avokatit të Popullit se për rastin e ish-Presidentit janë shkelur të drejtat normale të çdo personi në izolim.
Kryetari i PL, thotë se do të paraqes me shkrim të gjitha shkeljet ligjore qe janë bërë ndaj tij. Ai thotë se që nga korriku i vitit të shkuar është përballur me izolim ekstrem.
PYETJE: A ka probleme me trajtimin tuaj? Avokati i Popullit ka deklaruar se tek ju janë shkelur të drejtat normale të çdo personi në izolim. A është çdo gjë ok?
PËRGJIGJE: Besoj se konstatimet dhe rekomandimet e Avokatit të Popullit kanë qenë të qarta dhe publike për shkeljen e të drejtave të mia.
Së fundmi, pata rastin të vizitohesha në ambientet e ajrimit nga Drejtori i Përgjithshëm i ri i Burgjeve, Z. Adriatik Kupi.
Biseda ishte konstruktive dhe unë do t’ia parashtroj me shkrim kërkesat e mia që bazohen vetëm në të drejtat kushtetuese dhe Konventës Europiane të të Drejtave të Njeriut.
Por është fakt se që nga 2 korriku 2025, kur unë iu përgjigja disa pyetjeve të gazetares Znj. Aida Toncica, jo vetëm që u dënova me izolim ekstrem, por kurrë nuk mu dorëzua vendimi i dënimit në dorë (!!!).
Po e drejta e ankimit a ekziston në Republikën tonë?
