Gjoni: Protesta e sotme është ballafaqimi i qytetarëve me qeverinë më të korruptuar të historisë
Në një reagim për Syri TV, deputeti i Partisë Demokratike Gjin Gjoni ka bërë thirrje për një mobilizim të gjerë qytetarësh në protestën e sotme, duke theksuar se është koha për të sfiduar qeverinë e korruptuar dhe totalitare.
Gjoni u shpreh se interesimi i shtuar i qytetarëve për këtë protestë vjen si pasojë e një frustrimi të thellë ndaj qeverisë, e cila sipas tij ka dështuar të përmbushë kërkesat e qytetarëve dhe të luftojë korrupsionin. Ai shtoi se, sipas raporteve ndërkombëtare, korrupsioni në qeverinë aktuale ka arritur nivele alarmante dhe kjo ka shtuar ndjeshëm pasigurinë dhe mungesën e besimit tek institucionet
Gjoni apeloi për një pjesëmarrje masive në protestë, duke nënvizuar se çdo qytetar ka arsye të forta për të protestuar kundër një qeverie që po vjedh të ardhmen e shqiptarëve.
Fjala e tij:
Protesta e ditës së sotme, ka një interes të shtuar nga ana e gjithë qytetarëve. Përveç organizimeve që Partia Demokratike ka bërë si rutinë për çdo protestë, njëra pas tjetrës, padyshim që ka një interes të shtuar edhe për shkak të pritshmërive që protestuesit dhe qytetarët e Lezhës kanë pasur në lidhje me protestën e fundit, si dhe për shkak të mënyrës se si u organizua në një formë tjetër nga të gjitha protestat e tjera. Besoj se protesta e sotme do të ketë një pjesëmarrje edhe më të madhe dhe padyshim edhe skenarët do të jenë krejtësisht të ndryshëm nga të gjithë protestat e tjera.
Unë ju bëj thirrje edhe atyre njerëzve që janë në rrugë, t’i bashkohen sa më parë protestuesve në Tiranë dhe të japin kontributin e tyre kundër kësaj qeverie totalitare, një qeverie që është më e korruptuar. Sipas Transparency International, që u publikua ditën e sotme, kjo qeveri ka rënë 11 vende në renditjen e korrupsionit, çka tregon se perceptimi mbi korrupsionin në vitin 2025 është rritur më shumë në lidhje me këtë qeveri.
Njëkohësisht, shqiptarët kanë 1001 arsye për të protestuar dhe sot le të bëhemi të gjithë bashkë, të jemi në shesh për të protestuar pranë Kryeministrisë.
