Bota
Sociale
Sport
Kulturë
Koment
Kosovë

Si u vodhën të dhënat e SPAK-ut për llogari të ‘Ramës’ nga e-mail-i i Enkeleda Millonait dhe dy prokurorëve të tjerë

Si u vodhën të dhënat e SPAK-ut për llogari të ‘Ramës’ nga e-mail-i i Enkeleda Millonait dhe dy prokurorëve të tjerë

Është zbardhur dosja që shpjegon se si u “aksesuan” kompjuterët e tre prokurorëve të SPAK-ut.
Sipas akteve hetimore, gjithçka nisi kur u vu re se materiale sekrete hetimore po qarkullonin në format “Word” dhe po përfundonin te persona jashtë institucionit. Ndërkohë, nga verifikimet teknike nuk rezultoi asnjë shenjë se rrjeti ishte çarë me metoda të sofistikuara hakerimi.

Në dosje theksohet se hyrja në të dhëna ka ndodhur në mënyrë të drejtpërdrejtë përmes postës elektronike zyrtare, pasi disa llogari kishin mbetur me fjalëkalimin fillestar të dhënë nga IT në nisje të punës dhe nuk ishte ndryshuar kurrë, për shkak të pakujdesisë së prokurorëve.

Pikërisht këtu përmenden tre llogari prokurorësh që, sipas dosjes, rezultojnë të jenë bërë të aksesueshme: behar.dibra, enkelida.millonai dhe elida.kackini — e-mail-e që, siç pretendohet në aktet e hetimit, janë hapur me të njëjtin fjalëkalim fillestar.

Në deklarimet e administruara, i dyshuari Arnold Rrokaj shpjegon se, i shtyrë nga kureshtja, ka skanuar nën-domainet e “spak.gov.al” dhe është orientuar drejt faqes së postës elektronike, ku kërkoheshin kredencialet e hyrjes.

Më pas, ai pretendon se ka provuar emra përdoruesish me emrat e prokurorëve dhe fjalëkalimin “Spak@2019” dhe se ka arritur të hapë pikërisht llogaritë e Behar Dibrës, Enkelida Millonait dhe Elida Kaçkinit.

Në dosje sqarohet se për përdoruesit që e kishin ndryshuar fjalëkalimin, hyrja nuk është realizuar, çka përforcon tezën se problemi nuk ishte “hakerim” në kuptimin klasik, por neglizhencë në menaxhimin e fjalëkalimeve.

Aty përshkruhet edhe zinxhiri i shpërndarjes: pasi, sipas pretendimeve të dosjes, janë siguruar dokumente nga e-mail-et e prokurorëve, disa materiale i janë dërguar shtetasit Zambak Gjoni, i cili më pas pranon se i ka shpërndarë pjesërisht te rrethi i tij shoqëror dhe te gazetarë, duke pretenduar se është shtyrë nga kureshtja dhe se një pjesë e çështjeve ishin tashmë të përfolura publikisht.

Në aktet e dosjes përmenden konkretisht çështje që kanë marrë jehonë në media dhe që, sipas deklarimeve, kanë qenë pjesë e këtyre komunikimeve, si:

“… materiale për Arben Ahmetajn, procesverbale dhe akte mbi kontrollin e banesës së familjes Copaj, relacione dhe akte lidhur me hetimet për Damian Gjiknurin, si edhe dokumente të tjera hetimore që qarkullonin në format ‘Word/PDF’, përfshirë relacione, informacione të BKH-së dhe të prokurorëve, procesverbale këqyrjesh dhe letërporosi …”

Dosja shkon më tej edhe në aspektin teknik, pasi thuhet se:

“… sipas raportit të IT-së së institucionit, është kryer analizë e log-eve dhe janë konstatuar tentativa të dyshimta hyrjeje në një periudhë kohore, por nga verifikimet në pajisjet e sigurisë nuk rezultoi ‘thyerje’ e sistemeve mbrojtëse …”

Në përfundim, në aktet hetimore thuhet se mailbox-et e prekura kanë qenë ato me fjalëkalim të pandryshuar që nga krijimi. Pra, rasti përshkruhet si hyrje me kredenciale të hamendësuara ose të gjeneruara, të lehtësuara nga fakti që disa përdorues kishin lënë fjalëkalimin fillestar të pandryshuar.

Pikërisht kjo, sipas dosjes, është “çelësi” që hapi rrugën për nxjerrjen e materialeve sekrete hetimore nga komunikimet e brendshme të prokurorëve, duke e kthyer një standard bazik sigurie — ndryshimin e fjalëkalimit — në pikën më të dobët të gjithë historisë
Syri net

Share it :

Lajmet e fundit
CEZ-DIA dhe akuzat ndaj Metës/ Avokati Zhllima: Së shpejti VIDEO-ja me politikanin që merr para! Gjyqtarja Irena Gjoka, e cila po shqyrton çështjen ndaj ish-presidentit Ilir Meta, gjendet në qendër të akuzave për një konflikt të rëndë interesi. Nga dokumentet e paraqitura nga avokatët e ish presidentit në konferencën për media, mbrojtësi i Metës, Gylsen Zhllima, tha se gjyqtarja Gjoka rezulton të ketë qenë kryesuese në një gjykim të vitit 2016, ku është vendosur për konfiskimin e pasurive të shtetasit Kastriot Ismailaj, një fakt që, sipas akuzës, e bën të papërshtatshme për gjykimin aktual dhe kërkonte përjashtimin e saj nga çështja. Sipas avokatit, është e pamundur që një gjykatës të mos kërkojë përjashtimin kur brenda akteve të një çështjeje gjendet një lidhje e mëparshme. Përtej këtij rasti, avokati Zhllima pretendoi se caktimi i gjyqtares Gjoka në çështje të profilit të lartë politik, ndjek një model të caktuar, situatë e cila përshkruhet si pjesë e një “plani afatgjatë” për eliminimin politik të zotit Meta, duke përdorur atë që quhet “drejtësi perceptuese” dhe jo fakte penale. Avokati parlajmëroi se së shpejti do të publikohet një material ku do të tregohet me emër dhe mbiemër një politikan duke marrë para në dorë, në kuadër të marrëveshjes së shumëpërfolur CEZ-DIA, duke theksuar se Ilir Meta nuk ka asnjë lidhje me këtë aferë. Vendimi gjyqësor i Gjykatës së shkallës së parë të krimeve të rënda, që është kryesuese zonja Irena Gjoka, e cila ka konfiskuar pasuritë e zotit Kastriot Ismailaj. E kuptoni qartë se është e pamundur që në një proces gjyqësor dhe penal, gjykatësi mos të shikojë dhe mos të kërkojë vetë përjashtimin kur brenda akteve ndodhet emri i vetë dhe aty duhet të paktën të kërkojë që të heqi dorë për shkak se ka gjykuar në të shkuarën dhe në vitin 2016 pasurinë e personit të cilët janë i kanë konfiskuar pasurinë. Pra, e thënë me pak fjalë, për ata që besojnë tek drejtësia e pavarur e paanshme te GJKKO-ja, e cila është e pastruar nga vetingu me thonjëza, tregohet qartë që zonja Irena Gjoka është pothuajse te rasti i zotit Berisha, zotit Mediu, tek rasti i zotit Meta dhe ku ka opozitarë, zonja Gjoka është relatore dhe vendos gjithmonë në disfavor të opozitarëve. Por ajo që duhet të duket e çuditshme është kjo, e lidhur nga 2011-ta në vazhdim, që eliminimi politik i zotit Meta nuk është thjesht një plan afatshkurtër, është një plan afatgjatë dhe kuptohet që donin ta implikonin me shumë fakte penale, pra të asaj që ne themi perceptimi, pra drejtësia perceptuese njerëzore është më e rrezikshme se ajo faktike penale, por ne po paraqesim tek ju se si ata në perceptimin publik të videos së famshme të 2011-ës, në rast se do të kishte i ndjeri Dritan Prifti një fakt penal kundër zotit Meta, nuk do të bënte videon ku dyshohet që ka edhe një video për zotin Dritan Prifti, por ai do të sillte si fakt penal konkret rastin ÇEZ-DIA. Por ne do na lejoni, sepse edhe minutat janë të shkurtra, ne do na lejoni që në konferencën e radhës do ju nxjerrim një material ku duket qartë me emër dhe mbiemër politikani, i cili do të marri para në dorë nga kjo marrëveshje e famshme që është ÇEZ-DIA, që nuk ka lidhje fare i mbrojturi prej nesh zoti Ilir Meta. Pra, qartazi kërkoj regjinë, se kjo është fotografia më e mirë dhe më e bukur, pavarësisht se thamë shumë fakte të rëndësishme, se si ka mundësi që e njëjta gjykatëse të jetë edhe gjykatëse e seancës paraprake ndaj zotit Meta. Pra, i dhanë seancën paraprake, i dhanë mundësinë që të shikojë dhe të gjykojë dhe të hetojë, i nderuar koleg, në mënyrë të paanshme, të pavarur zonja Irena Gjoka, aktet kundër zotit Meta dhe ajo nuk tha të paktën një fjalë për sa i përket vendimit të 2016-ës, ku ajo vetë është e përfshirë për shkak se ka bërë konfiskimin e pasurive të Kastriot Ismailajt. Prandaj unë qëndroj në mënyrë të përmbledhur të gjithë ato që tha kolegu, por mos harroni një fakt shumë të rëndësishëm, që personi i cili ishte në kushtet e burgimit, zoti Kastriot Ismailaj, në 21.04.2022, tha qartë dhe duke qenë dhe pothuajse i kanosur nga shumë shumë faktorë të tjerë, deklaroi që midis zotit Elvis Mataj, zotit Romeo Kara dhe tij, ka pasur një marrëveshje, një marrëdhënie e cila ishte edhe monetare përveç të tjerash.
March 27, 2026