Jurges Veizaj
Fantazisti turk me pasaportë gjermane deklaroi se në mendjen e tij është vetëm një ekip. Reali qëndron në plan të parë për të dhe nuk ka ndonjë mundësi që beniamini i Murinjos të jetë larg dyerve të Madridit.
Ozil jep një intervistë pikante në të cilën zbulon shumë për të përditshmen “Bild”. Kryefjala e kësaj interviste ishte Reali i Madridit. Ozil mbi të tjera u shpreh: “Madridi është një qytet i mrekullueshëm. Jam shumë i lumtur këtu. Kam një besim shumë të madh nga ana e klubit dhe gjithashtu kam krijuar shumë miq këtu si Serxho Ramos apo dhe Benzema. Do të doja të luaja më shumë vite këtu. Madje, do të doja që ta mbaroja karrierën time këtu”, – deklaroi mesfushori fantazist. Turku me pasaportë gjermane gjithashtu tha që nuk ka aq shumë probleme në klub nga sa mund të duket. ”Trajneri më i mirë në botë është Hoze Murinjo. Media asnjëherë nuk e di aspak se çfarë ka midis nesh. Shumë shpesh duhet thënë që gjërat ekzagjerohen. Ne qeshim në dhomat e ndenjes. Gjëja e vetme që më intereson është respekti midis nesh”, – tha mesfushori. “Tani kam 3 vjet që jetoj në Madrid dhe e shikoj që edhe jam pjekur edhe më shumë. Kam arritur të jem më konstant në punën time dhe kam arritur që të jem më i përgatitur në rolin tim. Por Murinjo e di çfarë unë mund të jap, pasi ne flasim shumë me njëri-tjetrin. Ai është i drejtë dhe i ndershëm me mua. Zakonisht Mou m’i jep instruksionet në spanjisht. Dhe nëse unë nuk e kuptoj drejt, ai m’i jep instruksionet në anglisht. Dhe nëse unë nuk e kuptoj prapë, atëherë unë flas me ndihmësin e tij, i cili di gjermanisht. Duhet të them që Hoze më jep besim dhe unë dua që të rikthehem dhe të kryej performaca sa më të mira për ta ndihmuar ekipin dhe teknikun tim. Pastaj vetë Mou ka thënë që unë jam lojtari i cili ka dashur të stërvisë”. Gjithashtu Mesut bëri edhe autokritikë. “Duhet të jem më i rrezikshëm para portës. Duhet të them që kam humbur më shumë se 10 gola të sigurt. Janë gola të cilat unë mund t’i realizoj”. Por në intervistën e tij ai nuk la mbrapa as për lojtarin më të mirë të skuadrës madrilene, Kristiano Ronaldo. ”Unë dhe ai mbajmë radhën në faulle kushdo që ndihet më mirë në ato moment. Unë marr kryesisht gjuajtjet që bëhen nga e majta, ndërsa ai pëlqen ato që vijnë nga e djathta. Kur kemi mosmarrëveshje se kush duhet ta gjuajë, bëjmë gjithmonë lojën guri, letra dhe gërshëra”. Por lojtari nuk vuri në dyshim as potencialin e tij. “Është e vërtetë që Mesi është i pakrahasueshëm, por edhe unë kam treguar në ndeshje të mëdha ndaj Barcelonës dhe kam treguar që mund të bëj gjëra të mëdha. Ne nuk i frikësohemi asnjë klubi, ne jemi Real Madrid. Nuk kemi kurrë ndrojtje ndaj ndonjë kundërshtari. Ne mund të fitojmë ndaj çdokujt”, – u shpreh shtatshkurtri. Në fund ai la edhe një koment për Guardiolën që firmosi për bavarezët. “Unë e njoh atë vetëm nga përballjet që kemi bërë ndaj Barçës, nuk është se kemi folur apo kemi pasur kontakt. Por di të them që gjithë ato trofe të fituara flasin vetë për punën që ai ka bërë për katalanasit”. Kështu e ka mbyllur intervistën për “Bild” lojtari i cili me sa duket, është i qetë pranë Realit. Shpesh është folur këtë sezon që marrëdhëniet midis tij dhe portugezit nuk kanë qenë të mira. Shkak për këtë janë bërë edhe ndeshjet në të cilat ai ka qenë në stol. Këtu duhet të kujtojmë bluzën e veshur të Serxho Ramos, i cili thuhej që në formë proteste ndaj vendimit të trajnerit, kishte veshur poshtë bluzës së tij bluzën e Mesutit dhe do ta hiqte vetëm nëse do të shënonte gol. Por kjo deklaratë duket se i ka qetësuar gjakrat duke u dhënë besimin tifozëve madrilenë që ai do të jetë në skuadër edhe për sezonin tjetër. Shpresa e vetme e tij pas ikjes së kampionatit është Liga e Kampioneve, por duhet të përballet me gjigantët e Mançester Junajtidit, që nuk do të lëshojë pe, pas shumë viteve pa trofeun e vjetër të Evropës.
Reali nuk do të lëshojë pikë
Hoze Murinjo akoma beson si shumica e madrilenëve që akoma Liga është e mundur. Humbja që katalanasit pësuan ndaj Malagës, e la Realin 15 pikë mbrapa Barçës, duke rikuperuar dy pikë dhe duke treguar që Liga akoma është e mundur. Kjo ka bërë që strategu Mou të lërë në stol për gjysmëfinalen e kupës Kasijas, Ksavi Alonso, Di Maria, Benzema dhe Kristiano Ronaldo, të cilët mund ta nisin nga stoli ndeshjen. Për herë të parë në këtë sezon duket se galaktikët po rikuperojnë pikë ndaj katalansve edhe pse duket se ata janë kujtuar shumë vonë.
Shnajder dhe Gallatasarai, holandezi më afër marrëveshjes
Shnajder dhe Gallatasarai duket se kanë arritur marrëveshjen. Fillimisht një drekë me Masimo Moratin pak orë më parë. Më pas ishte takimi i agjentit të lojtarit Lerbi me drejtuesit e Interit dhe dje në orët e vona të darkës me drejtuesit e klubit turk. Por të gjitha gjërave duket se do t’u jepet zgjidhje nesër, kur edhe fantasizti holandez mund të firmosë. Ndoshta sipas lajmeve, holandezi mund të bjerë dakord për 3 vite e gjysmë kontratë dhe te Interi do të shkojnë 10 milionë euro bonus.
Shifrat
Interi duhet të bjerë dakord për shifrën e 10 milionë eurove, ndërsa Uesli përveç bonuseve të marra, do të duhet që të kënaqet me një shifër pak më të ulët nga ajo çka merrte të zikaltrit. Ndërmjet holandezit dhe Gallatës mungojnë vetëm detajet. Ozkan Gokan ka thënë që vetë lojtari ka firmosur me skuadrën legjendare turke një kontrate prej afro 3 vjetësh agjenti i cili po merret me kalimin. Lojtari dhe familja e tij po shpresonin për t’u transferuar në Angli. Por insistimi i turqve ka qenë shumë i madh dhe më në fund kanë arritur që të gjejnë rrugën e duhur për transferimin.
Dreka midis Moratit dhe Shnajderit
Pas drekës drejtori i Interit dukej i lumtur dhe i çliruar. Ndërsa Shnajderi i cili pagoi dhe faturën, ka përsëritur që ai e do këtë klub dhe që do të jetë gjithmonë pjesë e tij edhe pse jo fizikisht. “Tifozët janë shumë të rëndësishëm dhe me shumë vlerë. Por nuk munda që të refuzoja ofertën e Gallatasarait. Shpresoj të shihemi”, – është shprehur në fund të drekës lojtari më i ri Gallatasarait.
