Synimi i Shqipërisë do të jetë që brenda vitit 2017 të ketë një pagë minimale jo më pak se 25 mijë lekë. Kjo rritje shihet si e pamundur nga bizneset dhe nga partnerët e huaj, por sipas Këshillit Kombëtar të Punës, çdo gjë është e mundur
Pas rritjes me 5% që pësoi një vit më parë, paga minimale do të rritet përsëri. Këshilli Kombëtar i Punës pritet t’i propozojë një tjetër rritje së pagës minimale qeverisë në muajt e ardhshëm. Edhe pse një rritje tjetër pritet të kundërshtohet fort nga bizneset, rritja do të realizohet në vlerën 1000 mijë lekë më shumë. Rritja pritet të ndihmojë të gjithë punëtorët e thjeshtë, të cilët do të kenë një pagë më të lartë. Sipas KKP-së, parashikohet që paga minimale prej 22 mijë lekësh në muaj të fillojë efektet financiare nga data 1 korrik 2013 për sektorin publik, ndërsa për biznesin rritja e pagës minimale hyn në fuqi më datën 1 janar 2014. Paga minimale përcaktohet duke u mbështetur në programin e qeverisë në fushën e pagave, nivelin ekzistues të pagave në ndërmarrjet dhe institucionet publike e private, si dhe ndikimin e vendosjes së taksës së sheshtë mbi të ardhurat personale.
Rritja
Sipas Këshillit Kombëtar të Punës, rritja e pagës minimale është ende në fazë diskutimi, por problemi më i madh qëndron te biznesi. Një vit më parë, Këshilli Kombëtar i Punës kërkoi që të bëhej rritja e pagës minimale nga 20 mijë lekë në 23 mijë lekë, por për shkak të kundërshtimeve të biznesit u la të rritej me 1 mijë lekë. Këtë vit, sipas KKP-së, edhe për do të ketë kundërshtime por kjo s’do të thotë mosrritje e pagës minimale. Rritja më e fundit do të bëjë që Shqipëria të lërë pas vende si Bullgaria dhe Rumania si dhe në vitet e ardhshme të tentojë të arrijë nivelin e Rumanisë. Konkretisht, këto vende kanë pagën minimale nga 148 euro deri në 175 euro.
Drafti
Synimi i Shqipërisë do të jetë që brenda vitit 2017 të ketë një pagë minimale jo më pak se 25 mijë lekë. Kjo rritje shihet si e pamundur nga bizneset dhe nga partnerët e huaj, por sipas Këshillit Kombëtar të Punës, çdo gjë është e mundur dhe në draftin e ri do të kërkohet që të ketë rritje të pagës minimale për çdo vit.
Paga minimale në rajon
Kroacia 371 euro
Serbia 166 euro
Rumania 161 euro
Mal i Zi 150 euro
Bullgaria 148 euro
Greqi 739,56 euro
Vendet me pagën minimale më të lartë
Luksemburg 1757.56 euro
Belgjikë 1498.87 euro
Irlandë 1499,33 euro
Holandë 1424.40 euro
Francë 1365 euro
Austri 1000, euro
Qipro 909 euro
Maltë 664,95 euro
Spanjë 641,50 euro
Slloveni 530,00 euro
Portugali 485 euro
Sllovaki 317,00 euro
Estoni 278,02 euro
Rritet treguesi i besimit në ekonomi në tremujorin e fundit 2012
Kontributin kryesor në përmirësimin e tremujorit të fundit e dha sektori i shërbimeve, me një rritje me 9.7 pikë përqindjeje krahasuar me tremujorin e mëparshëm. Ky përmirësim erdhi falë rritjes së vlerësimit të bizneseve të këtij sektori
Treguesi i besimit në ekonominë shqiptare u përmirësua në tremujorin e fundit të vitit 2012. Pas disa tremujorësh kur bizneset dhe konsumatorët shfaqnin pesimizëm për gjendjen e ekonomisë, në tremujorin e katërt Treguesi i Ndjesisë Ekonomike, i llogaritur nga Banka e Shqipërisë u përmirësua me 6.5 pikë përqindjeje krahasuar me tremujorin e mëparshëm.
Megjithatë, duhet thënë se ky tregues vazhdon të qëndrojë thellësisht poshtë mesatares afatgjatë, me mbi 17 pikë përqindjeje. Kontributin kryesor në përmirësimin e tremujorit të fundit e dha sektori i shërbimeve, me një rritje me 9.7 pikë përqindjeje krahasuar me tremujorin e mëparshëm. Ky përmirësime erdhi falë rritjes së vlerësimit të bizneseve të këtij sektori për gjendjen e përgjithshme të biznesit, gjendjen financiare dhe punësimin.
Por, edhe në këtë sektor, treguesi i besimit qëndron afro 6 pikë përqindjeje poshtë mesatares afatgjatë. Kontribut pozitiv në rritjen e besimit në ekonomi dha edhe industria, ndonëse në një masë më të vogël. Treguesi në këtë sektor u përmirësua me 1.2% krahasuar me tremujorin e tretë të vitit. Industritë patën një vlerësim më të mirë për ecurinë e prodhimit dhe të punësimit, ndërsa një përmirësim njohën edhe pritshmëritë për tremujorin e parë 2013.
Sektorët e tjerë
Treguesi i besimit në ndërtim vazhdoi rënien edhe në tremujorin e katërt 2012, me 5.6 pikë përqindjeje, duke prekur një minimum të ri historik.
Aktualisht, ky tregues është 34 pikë përqindjeje poshtë mesatares afatgjatë. Ndikimin kryesor në këtë rezultat e dha përkeqësimi i mëtejshëm i vlerësimeve për kërkesën dhe për prodhimin e sektorit.
Ndërkohë që besimi i konsumatorëve dhe sektorit të ndërtimit kanë shënuar ulje, duke ndikuar negativisht në këtë tregues.
Besimi i konsumatorëve ra me 3.2 pikë përqindjeje në tremujorin e fundit në raport me atë të tretin, duke qëndruar 4.1 pikë përqindjeje poshtë mesatares afatgjatë. Konsumatorët janë pesimistë lidhur me situatën e tyre financiare, ekonominë dhe të ardhurat e shpenzimet e tyre personale, ndërkohë që vihet një përmirësim i lehtë në blerjet e mëdha.
Konsumatorët kanë vlerësuar në rritje koston e tyre të jetesës gjatë tremujorit të katërt, sipas Bankës së Shqipërisë.
Në një situatë të tillë pritet që të vijojë frenimi i konsumit të brendshëm.
