Kryeministrit të Malajzisë iu desh të komunikojë lajmin tragjik se: 239 pasagjerët e avionit MH370 të shoqërisë ajrore Malaysia-Airlines, kanë gjetur vdekjen në një zonë detare në perëndim të qytetit australian Perth.
Avioni i shoqërisë ajrore Malaysia-Airlines i zhdukur që prej më shumë se dy javësh, sipas të dhënave nga analizat e fundit është rrëzuar në Oqeanin Indian. Sinjali i fundit i avionit është regjistruar nga një rajon në perëndim të qytetit australian Perth, një distancë kjo shumë e largët për të qenë një vend i mundshëm uljeje për avionin, tha kryeministri malajzezez Najib Razak në një konferencë shtypi në Kuala Lumpur. Rreth 2500 kilometra në jugperëndim të Perth janë parë pjesë, që mund t’i përkasin avionit në fjalë.
“Me keqardhje dhe i prekur thellë më duhet t’ju them(…), se avioni MH370 ka përfunduar në jug të Oqeanit Indian”, tha Najib. Analiza e fundit vjen nga firma satelitore Inmarsat, e cila ka kapur sinjalet e fundit elektronike të Boeing 777 me 239 pasagjerë në bord.
Të afërmit e viktimave të tronditur prej dhimbjes
Siç njoftoi radioja britanike BBC, shoqëria ajrore Malaysia-Airlines i informoi të afërmit e pasagjerëve për fatkeqësinë përmes mesazheve SMS, duke u komunikuar atyre, se nuk ka të mbijetuar. Familjet e pasagjerëve kinezë u informuan në një hotel në Pekin. Disa prej tyre reaguan pas këtij lajmi me ulërima dhe të qara të forta. Disa të afërm të viktimave pësuan shok humbën ndjenjat dhe u transportuan me autoambulancë. Gati dy të tretat e 239 pasagjerëve të avionit MH370 ishin nënshtetas kinezë.
Ekipazhi i avionit zbulues australian të hënën (24.03.2014) zbuloi pjesë të tjera, që dyshohet se i përkasin avionit të zhdukur deri më sot. Kërkimi ndaj avionit të pasagjerëve ditët e fundit u përqendrua në rajonin në jugperëndim të qytetit Perth. Boingu më 8 mars me 239 pasagjerët në bord u nis nga Kuala Lumpur për në Pekin dhe pak pas ngjitjes u zhduk prej mburojës së radarëve. Më pas u konstatua, se avioni MH370 duhet të ketë fluturuar edhe më tej me itinerar të ndryshuar.
DW.DE
Si humbi avioni
Shkaku i fatkeqësisë ajrore në Vietnam i paqartë
Përpara brigjeve të Vietnamit të shtunën ka ndodhur një aksident i rëndë ajror me një avion të Malaysia Airlines me 239 persona në bord. Kontakti me avionin e tipit 777-200 ishte ndërprerë dy orë pas nisjes së avionit në Malajzi, bëri të ditur shoqëria ajrore. Avioni sipas të dhënave të autoriteteve vietnameze në momentin e aksidentit gjendej mbi det, pak para hyrjes në hapësirën ajrore mbi Vietnam. Shkaku i fatkeqësisë është ende i paqartë. Nga ekuipazhi nuk ka pasur thirrje për ndihmë, situata e motit ishte normale. Fillimisht avioni nuk ishte e mundur të lokalizohej.”Mund të konfirmoj se avioni është rrëzuar. Tani ai konsiderohet i humbur”, tha zëdhënësi i Forcave Kombëtare të Shpëtimit, gjeneral-lejtnanti Pham Hoai Giang për gazetën “VTC News”. Sipas të dhënave të marinës vietnameze trupat e shpëtimit nga Malajzia dhe Vietnami janë drejtuar për në vendin ku supozohet se ka ndodhur askidenti. Në bord sipas të dhënave të agjencisë ajrore ndodheshin kryesisht pasagjerë kinezë por edhe evropianë, tre francezë, një austriak, një holandez dhe një italian. “Nga rajoni ku u zhduk avioni nuk ka pasur njoftime për situatë të pazakontë atmosferike”, tha zv/ministri vietnamez i Transportit Pham Quy Tieu për agjencinë e lajmeve dpa. Nuk ka pasur sinjale se avioni ishte në vështirësi, tha shefi i shoqërisë ajrore Malaysia Airlines, Ahmad Jauhari Yahya. Piloti ka qenë një punonjës me përvojë me më shumë se 30 vjet në detyrë. “Kur të dy pilotët janë të zënë me shpëtimin e avionit nga rrëzimi, në rrethana të caktuara nuk kanë më kohë të lidhen më qendrën e kontrollit në tokë”, tha zëdhënësi i Sigurisë së Fluturimit në Gjermani Axel Raab. Avioni ishte nisur nga kryeqyteti malajzian Kuala Lumpur dhe fluturonte drejt Pekinit. Në bord gjendeshin 12 pjesëtarë të ekuipazhit dhe 227 pasagjerë nga 14 vende. Familjarët e pasagjerëve që prisnin në aeroport në Pekin u dërguan në një hotel dhe po u ofrohet ndihmë psikologjike. Boeing ka mbledhur një ekip ekspertësh për të ndihmuar në zbardhjen e shkaqeve të fatkeqësisë, bëri të ditur kompania në faqen e saj të internetit. Vendi i supozuar i fatkeqësisë gjendet mes bregut lindor të Malajzisë dhe ekstremitetit jugor të Vietnamit, mes gjirit të Tajlandës dhe Detit Jugor Kinez. Malaysia Airlines është agjencia ajrore kombëtare në Malajzi. Ajo konsiderohet si një shoqëri ajrore e besueshme. Avionët që ajo përdor janë të tipit Boeing dhe Airbus dhe sipas të dhënave të saj fluturon cdo ditë në 80 destinacione brenda dhe jashtë vendit me rreth 37.000 pasagjerë.
