Lista e PD-së me 150 emra/ Zbardhen emrat e anëtarëve të rinj të Këshillit Kombëtar

September 30, 2014
6 Min Read

“Demokratët dëshmuan se çfarë është demokracia në veprim, kur me votim të lirë e të ndershëm zgjodhën drejtuesit e çdo niveli”

Partia Demokratike publikoi dje në mbrëmje listën me 150 anëtarët e rinj të Këshillit Kombëtar. Përmes një dalje publike nga selia blu, zëdhënësja e re e PD-së, Oriela Nebiaj thekoi se anëtarët e Këshillit u zgjodhën me votë të lirë, me parimin “një anëtar – një votë”. Në listë nuk mungonin emrat e ish-deputetëve demokratë, Fatbardh Kadilli, Enkelejd Alibeaj, Dashnor Sula apo edhe ish-zv.ministrja Edith Harxhi si edhe ish-deputeti socialist Asllan Dogjani. Po ashtu, pjesë e fituesve ishin edhe kreu i Komunës së Lazaratit, Dasho Aliko, dhe ish-drejtoresha e ISKSH-së, Elvana Hana. Mes emrave të zgjedhur në Këshillin Kombëtar të PD-së figuron edhe Petraq Milo, anëtar i Këshillit Mbikëqyrës në Bankën e Shqipërisë. Për herë të parë në Këshill hyn edhe dhëndri i ish-kryeministrit Berisha, Jamarbër Malltezi, si edhe drejtuesja e grevës së të larguarve nga puna, Nertila Qafzezi. Këshilli drejtues si emra të rinj ka djalin e deputetit të vrarë të PD-së, Azem Hajdari, Kiri Hajdari, si edhe artistët Ermal Mamaqi, Julian Deda, Greta Koçi dhe kompozitori Shpëtim Saraçi. Emra të tjerë që bien në sy në këtë listë janë edhe ish-zv.drejtori i Policisë së Shtetit Agron Kuliçi, ish-drejtori i Burgjeve, Gazmend Dibra, ish-drejtori i Zyrës Hipotekës, Arben Qirjako, si edhe ish-kreu i Tatimeve, Arben Sefgjini. Pjesë e listës së anëtarëve të rinj të Këshillit janë dhe zërat femërorë të PD-së si Juela Meçani, Silvi Bardhi, Laura Vorpsi, Erla Mëhilli dhe Oriela Nebiaj. “Zgjerimi, hapja dhe ribashkimi, një proces i pandalshëm prej një viti, u finalizuan me punimet dy ditore të Kuvendit. Demokratët dëshmuan se çfarë është demokracia në veprim, kur me votim të lirë e të ndershëm zgjodhën drejtuesit e çdo niveli dhe 7500 delegatët e organit më të lartë vendimmarrës. Analiza serioze e shkaqeve të humbjes dhe angazhimi solemn për t’u korrigjuar dhe përmirësuar janë një kthesë vendimtare në kursin e politikës sot”, – tha zëdhënësja e PD-së.