Eurodeputetja kërkon moratorium për projektet në zonat e mbrojtura dhe rishikimin e ligjit
Eurodeputetja gjermane Terry Reintke kërkoi në Tiranë vendosjen e një moratoriumi për projektet në zonat e mbrojtura dhe përshtatjen e ligjit shqiptar me standardet e Bashkimit Evropian. Kërkesa mbështetet në qëndrimin e miratuar nga Parlamenti Evropian në qershor, ndërsa sipas mazhorancës shqiptare projekti në Zvërnec synon të përmbushë standardet mjedisore të BE-së.
Bashkëkryetarja e grupit të të “Gjelbërve/European Free Alliance” në Parlamentin Evropian, Terry Reintke, kërkoi të mërkurën në Tiranë që qeveria shqiptare të mos vonojë rishikimin e ligjit për zonat e mbrojtura dhe të vendosë moratorium për projektet e reja në këto territore, duke e lidhur çështjen me negociatat e Shqipërisë për Kapitullin 27, që lidhet me mjedisin dhe ndryshimet klimatike.
“Kërkojmë një moratorium për të gjitha planet e zhvillimit në zonat e mbrojtura”, u shpreh Reintke gjatë komunikimit me gazetarët në Tiranë.
Eurodeputetja tha se ndryshimet në kuadrin ligjor duhet të përputhen me legjislacionin mjedisor të Bashkimit Evropian dhe se debati nuk lidhet vetëm me mbrojtjen e natyrës, por edhe me mënyrën se si merren vendimet për projektet e mëdha, konsultimin me publikun dhe respektimin e procedurave. Ajo theksoi se zhvillimi i turizmit nuk përjashtohet, por sipas saj duhet të bëhet duke respektuar standardet mjedisore dhe ligjore.
Qëndrimi i Reintke lidhet me rezolutën për Shqipërinë të miratuar nga Parlamenti Evropian më 17 qershor 2026 me 483 vota pro, 103 kundër dhe 70 abstenime. Në tekstin e miratuar, eurodeputetët kërkuan një moratorium të menjëhershëm për procedurat e reja të lejeve, punimet dhe ndërhyrjet zhvillimore në zonat e mbrojtura, deri në heqjen e dispozitave që konsiderohen të papajtueshme me standardet e BE-së për mbrojtjen e natyrës.
Në qendër të debatit është ligji i miratuar nga Kuvendi më 22 shkurt 2024, i cili ndryshoi ligjin nr. 81/2017 “Për zonat e mbrojtura”. Regjistri zyrtar i Qendrës së Botimeve Zyrtare e evidenton këtë akt si ndryshimin e ligjit bazë për zonat e mbrojtura.
Edhe Komisioni Evropian ka ngritur më herët shqetësime për këto ndryshime. Në raportin e vitit 2025 për Shqipërinë, Komisioni vlerësoi se ndryshimet e vitit 2024 sollën dobësim të mbrojtjes së natyrës dhe kërkoi përmirësim të përafrimit me legjislacionin e BE-së për habitatet dhe shpendët.
Reagimi i Reintke vjen pas takimit të 22-të të Komitetit Parlamentar të Stabilizim-Asociimit BE–Shqipëri, të zhvilluar më 21 dhe 22 shtator në Tiranë. Parlamenti Evropian e kishte përfshirë zyrtarisht këtë takim në kalendarin e delegacionit për marrëdhëniet me Shqipërinë.
Gjatë këtyre ditëve, një pjesë e delegacionit të eurodeputetëve vizitoi edhe Zvërnecin, ku projekti turistik i parashikuar në zonë ka qenë objekt protestash dhe debatesh për ndikimin në mjedis.
“Angazhimet mjedisore për zhvillimin e turizmit në këtë zonë synojnë të përmbushin ose të tejkalojnë kërkesat e Bashkimit Europian”, shkroi pas vizitës në rrjetet sociale Taulant Balla, kryetar i Grupit Parlamentar të Partisë Socialiste dhe drejtues i delegacionit shqiptar në komitetin BE-Shqipëri.
Reintke, nga ana tjetër, tha se kërkesa e Parlamentit Evropian për zonat e mbrojtura mbetet në fuqi dhe se zbatimi i standardeve mjedisore do të vijojë të jetë pjesë e diskutimeve për avancimin e Shqipërisë në negociatat e anëtarësimit. / Amfora.al
