Boçi në Vlorë: Reforma territoriale e 2014 dështoi, ishte reformë e pushtetit dhe jo e qytetarit!
Deputeti i PD, Luçiano Boçi deklaroi se reforma e vitit 2014 ka dështuar dhe se vendi ka nevojë për një model të ri, të bazuar te qytetari, shërbimet dhe decentralizimi real. Qëllimi është t’i shërbejmë qytetaritër reformën administrativo-territoriale.
Boçi theksoi se dëgjesat publike nuk duhet të mbeten një ushtrim formal, por duhet të prodhojnë një përfundim konsensual mes opozitës dhe mazhorancës.
“Ky komision duhet të ketë një konkluzion konsensual. Përndryshe, të gjitha dëgjesat, gjithë fjalët e mira dhe gjithë investimi i bërë gjatë kësaj kohe nuk vlejnë,” u shpreh Boçi.
Ai tha se territori nuk mund të lexohet vetëm në Kuvend apo në komisione parlamentare, por në realitetin e përditshëm të qytetarëve.
Sipas Boçit, reforma e vitit 2014 nisi si reformë administrative, por përfundoi si projekt politik që e ktheu pushtetin vendor në zgjatim të pushtetit qendror.
Boçi: Të dashur qytetarë të Vlorës, të nderuar deputetë dhe drejtues të pushtetit vendor,
Sot është dëgjesa e katërt për reformën territoriale. Vlora ka specifikën e vet, sepse shpirti vlonjat e thotë të vërtetën.
E përshëndes punën e komisionit dhe faktin që po zhvillohen dëgjesa me komunitetet. Kjo është një gjë e mirë, por nuk duhet të mbetet vetëm këtu. Ajo që kemi kërkuar si përfaqësues të Partisë Demokratike, dhe dua ta insistoj sërish, është që ky komision duhet të arrijë në një konkluzion konsensual, të dakordësuar nga PD dhe mazhoranca. Përndryshe, të gjitha këto dëgjesa, gjithë këto fjalë të mira dhe gjithë investimi i bërë gjatë kësaj kohe nuk vlejnë.
Kjo dëgjesë vlen më shumë se bisedat e mbyllura në salla dhe vendimet e marra brenda katër mureve. Këto dëgjesa nuk duhen vetëm për denoncime apo lavdërime, por për të përcjellë propozime të rëndësishme nga zëri i qytetarëve.
Territori nuk lexohet në Kuvend dhe as vetëm në komision. Territori lexohet në dëgjesat publike, në rrugët e braktisura, në fshatrat e Vlorës, në problemet që ka Saranda, Orikumi, Kota, Selenica dhe e gjithë hapësira e madhe e këtij qarku, që është ndër më të rëndësishmit në vend. Vlora zë gati 10% të sipërfaqes së Shqipërisë dhe ka një peshë të madhe edhe në popullsi sipas censusit.
Reformat janë ato që duhet të sjellin ndikim të drejtpërdrejtë te qytetarët. Jam dakord që pushteti vendor ka lidhje të fortë me ndjeshmërinë qytetare. Prandaj kjo reformë ka rëndësi të madhe dhe specifike.
Pse kemi ardhur përsëri te kjo reformë? Sepse duket sikur po jetojmë në regjimin e reformave. Por ne nuk duhet të krahasojmë veten thjesht me vitin 2014. Duhet të krahasojmë atë që u premtua në vitin 2014 me atë që solli realisht kjo reformë. Këtu është esenca e qëndrimit tonë.
A dështoi reforma e vitit 2014? Përgjigjja ndaj kësaj pyetjeje tregon se ku ndodhemi sot. A është më mirë jeta e qytetarit para apo pas kësaj reforme? Le ta shohim realisht se ku ndodhet sot pushteti vendor në Shqipëri.
Na duhet sinqeritet, personalitet dhe guxim për t’i shërbyer qytetarit dhe pushtetit vendor. Këtu nuk na ka sjellë “reforma e suksesshme” e vitit 2014. Këtu na kanë sjellë shqetësimet dhe nevojat e qytetarëve.
Ajo reformë nuk u ka dhënë liri as kryetarëve të bashkive, të cilët i kanë duart e lidhura nga pushteti qendror. Madje nuk na ka sjellë këtu as Bashkimi Europian, edhe pse ne duam të jemi pjesë e tij. Na kanë sjellë këtu nevojat reale të qytetarëve.
Dështimin e vitit 2014 e prekim në çdo cep, por në Vlorë ju e ndjeni më mirë. Në Gjirokastër pamë një ndarje territoriale më të balancuar në lidhje me popullsinë, por përsëri kishte probleme decentralizimi. Elbasani ka probleme edhe në ndarjen territoriale, edhe në decentralizim. Vlora është një rast miks.
Edhe raporti i Bankës Botërore i vitit 2024 e thotë këtë, duke marrë si shembull Selenicën dhe bashki të tjera, ku madhësia e bashkive nuk e zmadhoi qytetarin, por e zvogëloi atë. Këto ndarje territoriale ulën fuqinë e shërbimeve, pa folur për diskriminimin mes territorit, zonave urbane dhe rurale.
Edhe këtu në Vlorë kemi diferenca të mëdha shërbimesh në lagje të caktuara. Sepse Vlora nuk është vetëm Lungomare. Vlora është shumë më e madhe.
Mbi të gjitha, ajo që shmanget dhe duhet artikuluar qartë është se reforma e viteve 2014–2015 nisi si reformë administrative dhe përfundoi si reformë politike. Nisi si ide administrative, por u kthye në projekt politik. Pushteti vendor u perceptua si zgjatim i pushtetit qendror.
Kjo varësi e ka shkatërruar pushtetin vendor. Ajo ishte reformë e pushtetit, jo e qytetarit. Dhe si e tillë nuk i shërben qytetarit.
Sot po shohim se vendet e punës janë shtuar, abuzimi është shtuar, centralizimi është rritur dhe 43 kryetarë apo ish-kryetarë bashkish kanë përfunduar në dyert e SPAK. Ky është realiteti
A duam zgjidhje? Po. Ne jemi të qartë në qëndrimin tonë: funksionalitet, dhënie kompetencash dhe shtim shërbimesh. Duhet mbështetje nga buxheti i shtetit dhe një ndarje territoriale që i shërben qytetarit.
Orikumi duhet të jetë bashki më vete. Mifoli duhet të jetë bashki më vete. Zona e Kotës duhet të jetë bashki më vete.
Ne duhet të flasim për shërbimet dhe për territorin, sepse territori nuk është qëllim në vetvete. Qëllimi është t’i shërbejmë qytetarit.
