Foltorja në Dibër’, Kaloshi: Qeveria ka braktisur qytetarët, vendi po boshatiset nga varfëria dhe papunësia
Kryetari i PD-së Dibër, Jeton Kaloshi, gjatë fjalës së tij në foltoren e mbajtur në Dibër, tha se qeveria aktuale nuk ka në fokus qytetarin, por interesat e një grupi të vogël njerëzish që, sipas tij, përfitojnë nga buxheti i shtetit në kurriz të qytetarëve.
Në një takim me demokratë, të zgjedhur vendorë dhe qytetarë, Kaloshi u shpreh se Dibra, pavarësisht potencialit të saj të madh, po përballet me pasoja të rënda si rezultat i politikave të gabuara qeveritare. Sipas tij, mungesa e infrastrukturës dhe papunësia e lartë kanë sjellë largimin masiv të banorëve, veçanërisht të rinisë.
Sot qyteti dhe fshatrat përreth janë boshatisur. Shkollat po mbyllen, shtëpitë janë të kyçura dhe sipërfaqe të tëra toke kanë mbetur djerrë,” u shpreh Kaloshi
Ai theksoi gjithashtu se sektorët kryesorë të ekonomisë lokale si bujqësia, blegtoria dhe frutikultura janë lënë pa mbështetje dhe në vështirësi të mëdha, duke mos siguruar dot as minimumin e nevojshëm për jetesë.
Duke iu referuar vizitave të fundit të kryeministrit në zonë, Kaloshi tha se premtimet e bëra nuk janë shoqëruar me masa konkrete për fermerët dhe zhvillimin rural.
“Fermerët nuk ushqehen me fjalë boshe. Ata kanë nevojë për subvencione reale dhe mbështetje të vërtetë,” deklaroi ai.
Në përfundim të fjalës së tij, Kaloshi theksoi se largimi i kësaj qeverie është domosdoshmëri, ndërsa shtoi se vendit i duhet një qeveri më pranë qytetarëve, e cila dëgjon problemet dhe ofron zgjidhje konkrete.
Sipas tij, Partia Demokratike mbetet alternativa e vetme që mund ta nxjerrë vendin nga kriza aktuale ekonomike dhe sociale.
Fjala e plotë:
“E nderuar deputete, zonja Denisa Vata. Të nderuar kryetarë të partive, Mat, Klos dhe Bulqizë. Të nderuar demokratë dhe demokrate. Të nderuar miq dhe të ftuar.
E nis fjalën time me një falenderim të veçantë për secilin prej jush, për mundin dhe sakrificën që po bëni çdo ditë për Partinë Demokratike.
Kjo sakrificë që ne po bëjmë sot, nuk i shërben vetëm forcës tonë politike, por i shërben Shqipërisë dhe brezave që do vijnë.
Miqtë e mi, sot Shqipëria qeveriset nga një qeveri që nuk ka në fokus qytetarin, por interesat e një grupi të vogël njerëzish që përfitojnë duke zhvatur buxhetin e shtetit shqiptar.
Dibra, megjithëse është një vend i begatë, po përballet me pasoja tepër të rënda, pasoja të cilat vijnë si rezultat i politikave të gabuara nga ana e qeverisë.
Mungesa e infrastrukturës dhe papunësia kanë bërë që popullsia të largohet.
Sot qyteti dhe fshatrat përreth janë boshatisur, rinia është larguar. Kudo sheh shtëpi të kyçura, shkolla të mbyllura dhe sipërfaqe të tëra toke të lëna djerr.
Edhe pse bujqësia, blegtoria dhe frutikultura janë sektorët kryesorë të vetëpunësimit, ato janë lënë në mëshirë të fatit.
Miqtë e mi, para pak ditësh kryeministri ishte në Peshkopi dhe premtoi shumë, por harroi diçka. Harroi fermerët, të cilët nuk ushqehen me fjalë boshe.
Ata kanë nevojë për një mbështetje reale dhe subvencione konkrete. Prandaj sot më shumë se kurrë, largimi i kësaj qeverie është domosdoshmëri.
Vendit i duhet një qeveri që është më afër qytetarëve, që dëgjon problemet e tyre dhe që ofron zgjidhje.
Partia Demokratike ka treguar se është alternativa e vetme që mund ta nxjerrë vendin nga kjo situate”.
