Bushati: Dhuna ndaj protestave po rritet për shkak të mungesës së legjitimitetit
Analisti Andi Bushati, i ftuar në emisionin ‘Çim Peka Live’ në SYRI TV, ka deklaruar se përshkallëzimi i dhunës ndaj protestave të opozitës lidhet drejtpërdrejt me krizën e legjitimitetit të qeverisë së Edi Rama.
Sipas tij, reagimet e ashpra të policisë nuk janë të rastësishme, por pjesë e një qasjeje më të gjerë represive për të frenuar kundërshtinë politike dhe zërat kritikë në vend. Bushati theksoi se kjo klimë presioni nuk kufizohet vetëm te opozita, por reflekton një tendencë më të gjerë kontrolli mbi shoqërinë, duke synuar dekurajimin e protestave dhe çdo forme reagimi publik kundër qeverisë.
Andi Bushati: Dhuna nëpër protesta në fakt vetëm është ashpërsuar sepse reagimet e policisë të dhunshme kanë qenë që në kohët e Lulzim Bashës, në qoftë se e mbani mend. Biles atëherë ishin ambasadat që ishin kundër shumë opozitës dhe prapë thoshin, reagimi i policisë është jo proporcional. Kështu që ose… komenti i parë është që kemi një inerci dhe një vazhdimësi. Në qoftë se do donim të komentojmë është pse është shtuar? Ndërkohë që dhe a përkon kjo shtesë me diskurin e Ramës, të mediave të Ramës, të Partisë Socialiste që thonë, kjo është një opozitë e vdekur, pasuria jonë më e madhe është që është atje Saliu, ne Saliun e mundim. Atëherë, një njeri që nuk të shkakton probleme, pse duhet ta dhunosh non-stop është, është pyetja.
Është e kotë që në këtë tryezë ne të diskutojmë mbi teknikat e dhunës. Po ka pasur dhunë, ka pasur dhunë. Pastaj, çfarë sa kreativë janë ata në teknikë dhune, është çështje policore, nuk është çështje politike. Po të thosha që, në qoftë se duam patjetër të gjejmë një shpjegim që pse kjo dhunë vjen në rritje. Unë them që kjo nuk duhet gjetur në raport vetëm me PD-në, por duhet gjetur në raport total me gjithë shoqërinë. Shikoni çfarë dhune ushtruan mbi një njeri që unë s’kam ndonjë lloj respekti, për tre statuse për Elisa Spiropalin.
Dhe Elisa Spiropali në këtë rast na shërben…që ju sulën me tatimor, me… Domethënë, na shërben Elisa si lakmues për të kuptuar pse po ushtrohet dhunë dhe ndaj PD-së. Për tre statuse në Facebook. Rama e ka kuptuar që nuk ka legjitimitet publik. Domethënë unë kam njerëz, familjarë të mi që kanë, po t’i çosh prapë për Ramën votojnë. Kanë votuar sistematikisht. Po kur ulesh në tavolinë ti, ata të thonë që, Edvin Rama e dimë që është hajdut. Nuk e shesim, po e dimë. Pra, legjitimiteti i ka rënë totalisht. Dhe si mundesh ti pa legjitimitet të vazhdosh të qeverisësh? Vetëm duke frikësuar çdo zë dhe çdo qelizë, apo çdo shkëndi proteste, fjale të lirë, grupimesh brenda partisë. Pra, në qoftë se do duhej të na gjente një shpjegim, unë kështu e shpjegoj dhe shtimin e dhunës ndaj protestave të opozitës, që në fakt duhet thënë nuk janë protestat më të mëdhaja që opozita ka zhvilluar. Pra, kur është protesta më e vogël, ti je më i kujdesshëm se nuk të shkakton problem. Jo, këta shtojnë dhunën. Shtojnë dhunën sepse duan, mesazhi që duan të çojnë, s’duam më protesta këtu. Nuk duam më kundërshti brenda Partisë Socialiste. Pra, represioni është një represion që shtohet mbi gjithë shoqërinë dhe pasqyrohet dhe ndaj opozitës.
