Kush janë gjyqtarët që votuan pro dhe kundër Ramës dhe Ballukut në Kushtetuese

Kush janë gjyqtarët që votuan pro dhe kundër Ramës dhe Ballukut në Kushtetuese

Gjykata Kushtetuese ka rrëzuar kërkesën e kryeministrit Edi Rama për heqjen e masës së pezullimit nga detyra të zëvendëskryeministres Belinda Balluku, pas një mbledhjeje maratonë që zgjati mbi 10 orë.

Vendimmarrja u mbyll me votim 4 me 4, çka sipas Kushtetutës do të thotë mungesë e shumicës së nevojshme dhe rrjedhimisht rrëzim automatik i ankimit të kryeministrit, duke lënë në fuqi masën e vendosur nga GJKKO.

Katër gjyqtarët e Kushtetueses që votuan pro kërkesës së qeverisë, Marjana Semini, Gent Ibrahimi, Sonila Bejtja dhe Fjona Papajorgji.

Ndërsa ata që votuan kundër kërkesës së kryeministrit janë: Marsida Xhaferllari, Ilir Toska, Sandër Beci, Asim Vokshi.

Këta gjyqtarë mbështetën argumentin se masa e pezullimit të një anëtari të Këshillit të Ministrave kërkon autorizim paraprak nga Kuvendi, pasi prek drejtpërdrejt funksionimin e pushtetit ekzekutiv dhe balancën e pushteteve.

Belinda Balluku ishte pezulluar nga detyra më 20 nëntor 2025 me kërkesë të SPAK, nën akuzën e shkeljes së barazisë në tendera në vlerë mbi 200 milionë euro, përfshirë tenderin e Tunelit të Llogarasë dhe procedura të tjera të lidhura me Unazën e Madhe.

Pas këtij vendimi, kryeministri Rama e çoi çështjen në Gjykatën Kushtetuese, duke pretenduar se GJKKO kishte cenuar kompetencat e tij si kryeministër. Ky pretendim nuk mori mbështetjen e nevojshme në Kushtetuese.

Tashmë, pas këtij vendimi, pritet zhvillimi i procedurave të mëtejshme në Kuvend, lidhur me kërkesën e SPAK për arrestimin e Balluku.