Pas skandalit me mjekët në Spitalin Onkologjik, ku mjekët në bashkëpunim dhe me stafin transferonin të sëmurët në klinika private, ka reaguar edhe Urdhri i Mjekëve të Shqipërisë.
Në deklaratën e tyre zyrtare, UMSH e konsideron kriminale atë që ka ndodhur dhe shton se persona të tillë nuk duhet të kenë vend në mesin e bluzave të bardha.
DEKLARATË NGA URDHRI I MJEKËVE TË SHQIPËRISË
Nëpërmjet mediave mësuam për skandalin e rëndë korruptiv në shërbimin e onkologjisë të QSUT. Ku 8 persona (midis tyre 3 mjekë) ishin përfshirë në një skemë abusive dhe kriminale gjatë ofrimit të shërbimit mjekësor. UMSH është distancuar dhe shprehur gjithmonë ashpër ndaj çdo akti korruptiv të shfaqur tek bluzat e bardha. Veprime të cilat bien ndesh dhe shkelin rëndë Etikën dhe Deontologjinë Mjekësore, cënojnë besimin dhe marrëdhëniet mjek-pacient, si elementë të domosdoshëm në suksesin e trajtimeve mjekësore.
Të tillë individë nuk duhet të kenë vend midis nesh. Ata nuk mund të baltosin dhe të mohojnë punën, përkushtimin dhe sakrificat e gjithë armatës së madhe të bluzave të bardha në mbrojtje të shëndetit të popullatës.
