Transparency International/ Shqipëria në fund të tabelës: Një dështim që qeveria përpiqet ta fshehë
Raporti më i fundit i Transparency International, Corruption Perceptions Index 2025, e rendit Shqipërinë me vetëm 39 pikë, ndërkohë që mesatarja globale është 42. Ky nuk është thjesht një hendek statistik, është një provë e qartë se vendi vazhdon të mbetet nën standardin botëror për luftën kundër korrupsionit.
Pavarësisht propagandës për “reforma historike” dhe “luftë të pakompromis”, realiteti është i zymtë: Shqipëria perceptohet ende si një vend me korrupsion të lartë në sektorin publik. Ndërsa demokracitë funksionale arrijnë mbi 70 pikë, ne mbetemi të ngujuar në një nivel që flet për mungesë transparence, kapje institucionesh dhe mosndëshkim
Qeveria ka vite që premton drejtësi të re, prokurime të pastra dhe standarde europiane. Por 39 pikë janë një shuplakë ndaj këtyre pretendimeve. Nëse reformat do të kishin dhënë rezultat real, Shqipëria jo vetëm që do të kishte kaluar mesataren globale, por do të ishte në një trajektore të qartë përmirësimi. Në vend të kësaj, stagnimi vazhdon.
Raporti nënvizon se vendet me institucione të pavarura, media të lirë dhe kontroll të fortë institucional arrijnë rezultate të larta në luftën kundër korrupsionit. Kjo nxjerr në pah problemin thelbësor: institucionet shqiptare vazhdojnë të perceptohen si të ndikuara nga politika dhe interesat e ngushta, jo si mekanizma të pavarur në shërbim të ligjit.
Edhe krahasimi me rajonin nuk ofron arsye për krenari. Të jesh pak mbi mesataren e Evropës Lindore dhe Azisë Qendrore (34 pikë) nuk është sukses, është thjesht konfirmim se kemi zgjedhur të krahasohemi me më të dobëtit, jo me standardet e Bashkimit Europian që pretendojmë të arrijmë.
Ky raport është më shumë se një statistikë. Është një aktakuzë morale ndaj një sistemi që flet për reforma, por prodhon mosbesim. 39 pikë nuk janë numër teknik; janë tregues i një realiteti të hidhur: shteti ligjor në Shqipëri mbetet i brishtë, ndërsa korrupsioni vazhdon të jetë plagë e hapur./ transparency.org/
