Jeffrey Epstein u mbyt, dhe nuk u var në qelinë e tij të burgut në Nju Jork. Kjo sipas një mjeku të pranishëm në autopsinë e tij. Dr. Michael Baden ka kërkuar që shkaku i vdekjes së pedofilit të rihetohet, pothuajse 7 vjet pasi ai u gjet i pajetë në Qendrën Korrektuese Metropolitan më 10 gusht 2019.
Ai nuk është i bindur nga përfundimi i Zyrës së Mjekut Ligjor të Nju Jorkut se milioneri amerikan i mori jetën vetes teksa priste gjyqin ku akuzohej për trafikim seksual.
Mendimi im është se vdekja e tij ka shumë të ngjarë të jetë shkaktuar nga presioni i mbytjes dhe jo nga varja” – thotë patologu për “The Telegraph”, i cili u punësua nga të afërmit e financuesit.
“Duke pasur parasysh të gjitha informacionet që janë tani në dispozicion, janë të nevojshme hetime të mëtejshme mbi shkakun dhe mënyrën e vdekjes” – thotë ai.
Mjeku nuk e kreu vetë autopsinë, por ai ishte i pranishëm gjatë ekzaminimit dhe u angazhua si vëzhgues në emër të familjes së Epstein.
“Në kohën kur u krye autopsia nga mjeku ligjor, të dy ramë dakord që, në bazë të raportit të autopsisë dhe informacionit në dispozicion, nevojiteshin më shumë informacione për të përcaktuar shkakun dhe mënyrën e vdekjes”, – tha Dr. Baden.
Pas publikimit të më shumë se 3 milionë dokumenteve nga Departamenti i Drejtësisë i SHBA-së (DOJ), janë ngritur më shumë pyetje rreth natyrës së vdekjes së Epstein.
Të varrosura thellë në serinë e fundit të dosjeve janë edhe pamjet e papublikuara më parë që zbulojnë momentin kur rojet e burgut gjetën kufomën e pedofilit.
Një video tregon skicën e një roje burgu duke iu afruar një tavoline pranë qelisë së Epstein në orën 6:30 të mëngjesit në ditën e vdekjes së tij. Vetëm 10 sekonda më vonë, personi më pas shkon drejt qelisë.
Pak më shumë se një minutë pas kësaj, një roje shihet duke lëvizur para dhe mbrapa midis tavolinës së sigurisë, ku atij i bashkohen shpejt dy të tjerë zonës ku ndodhet qelia e Epstein.
Rojet shihen më pas duke vrapuar midis dy zonave. Epstein u shpall zyrtarisht i vdekur në orën 6:39 të mëngjesi.
Sipas dosjeve të sapopublikuara, hetuesit vunë re një hije në ngjyrë portokalli që ngjitej në një shkallë drejt qelisë së financierit natën e vdekjes së tij.
Zyrtarët nga FBI dhe Zyra e Inspektorit të Përgjithshëm (OIG) e Departamentit të Drejtësisë vunë re pamjet e dyshimta të kamerave të sigurisë, i cili mund të kenë qenë “një i burgosur” që ngjitej në katin ku mbahej pedofili famëkeq.
Një raport, vuri në dukje se në orën 22:39 të mbrëmjes më 9 gusht 2019, agjentët e FBI-së vunë re se “një shkëlqim portokalli duket se po ngjitet në shkallët e Nivelit L – ndoshta mund të jetë një i burgosur i shoqëruar lart në atë nivel”.
Dokumente të mëtejshme zbulojnë se autoritetet patën mosmarrëveshje rreth shkakut të “shkëlqimit portokalli” të pashpjegueshëm.
Teksa FBI dyshonte se ishte një i burgosur tjetër, Inspektori i Përgjithshëm kishte shkruar: “Të burgosurit janë aktualisht në izolim. Ka mundësi që dikush të ketë qenë me çarçafë ose rrobat e një të burgosuri”.
Raporti përfundimtar nga Inspektori i Përgjithshëm deklaroi: “Rreth orës 22:39, një oficer korrektues i paidentifikuar u shfaq duke u ngjitur shkallëve të nivelit L dhe më pas u rishfaq në pamjet e kamerës në orën 22:41.”
Analiza nga dy organet hetimore bie ndesh me deklaratat publike të bëra nga të paktën dy zyrtarë të lartë amerikanë.
Bill Barr, i cili ishte prokurori i përgjithshëm i SHBA-së gjatë mandatit të parë të Trump, pretendoi në një intervistë të vitit 2019 se ai kishte shqyrtuar personalisht pamjet e sigurisë që konfirmonin se askush nuk hyri në zonën ku ishte strehuar Epstein natën që vdiq.
Majin e kaluar, ish-zëvendësdrejtori i FBI-së Dan Bongino i tha Fox News: “Ka video të qartë si dita. Ai është i vetmi person atje dhe i vetmi person që del. Mund ta shihni.”
Ai shtoi pak para publikimit të videos gushtin e kaluar: “Po punojmë për ta pastruar atë për t’u siguruar që të kemi një [version] të përmirësuar dhe do të japim origjinalin në mënyrë që të mos mendoni se ka pasur ndonjë mashtrim.”
Në dritën e informacioneve të reja, Dr. Baden po kërkon hetime të mëtejshme mbi shkakun e vdekjes së financierit.
Në dhjetor, një version i censuruar i ekzaminimit pas vdekjes së Epstein u publikua si pjesë e publikimit të parë nga Departamenti i Drejtësisë të të ashtuquajturave dosjet “Epstein”.
Në dokument, “mënyra e vdekjes” së abuzuesit serial seksual është shënuar si “në pritje”, ndërsa kutitë ku duhej të shënohej “vrasje” apo “vetëvrasje” janë lënë bosh.
Sipas Dr. Baden, gjetjet e tij profesionale pas autopsisë më 11 gusht 2019 ishin “të paqarta”.
Certifikata e vdekjes së Epstein u publikua më pas në pritje të hetimeve të mëtejshme të shkakut, pretendoi ai.
Por 5 ditë më vonë, ky vendim dyshohet se u “zëvendësua” nga Dr. Barbara Sampson, ekzaminuesja kryesore mjekësore e atëhershme e Nju Jorkut.
Ajo vendosi që financieri “vdiq me varje” dhe mënyra ishte “vetëvrasje”. Ajo nuk ishte e pranishme gjatë autopsisë, pretendoi Dr. Baden.
Në atë kohë, Dr. Sampson e hodhi poshtë publikisht teorinë e Dr.Baden për mbytje, duke thënë se ajo i qëndron “vendosmërisht” përfundimit të saj.
Avokatët e pedofilit thanë se nuk ishin “të kënaqur” me gjetjet e mjekut ligjor. “Diagnoza u bë disa ditë pasi u dha shkaku i parë i vdekjes”, – thanë ata.
Në skenarë anormalë ose shumë të dyshimtë, ndonjëherë mund të duhen javë ose edhe muaj për të përcaktuar një shkak përfundimtar të vdekjes.
Patologu ishte një nga të parët që ngriti alarmin pas vendimit, duke i thënë Fox News në vitin 2019: “Provat shtyjnë drejt vrasjes dhe jo vetëvrasjes”.
“Ky ishte mendimi im në atë kohë dhe unë ende i qëndroj atij”, i tha ai The Telegraph në një intervistë të kohëve të fundit.
“Gjetjet e autopsisë janë shumë më në përputhje me një dëmtim shkatërrues të shkaktuar nga mbytja sesa nga varja për vetëvrasje”.
Departamenti i Drejtësisë dhe FBI-ja kanë deklaruar se Epstein i mori jetën vetes dhe se nuk ka prova që tregojnë se ai u vra në qelinë e tij.
Sipas autopsisë zyrtare, në qafën e financierit u identifikuan 3 fraktura të dallueshme: një në hipoidin e majtë dhe një në kërcin e tiroides në anën e djathtë, dhe një në të majtë.
92-vjeçari tha se nuk e ka parë kurrë vetëvrasje me varje, me tre fraktura qafe gjatë 50 viteve që kaloi duke shqyrtuar raportet e autopsisë për vdekjet e të burgosurve në të gjitha burgjet shtetërore dhe lokale të Nju Jorkut.
“Edhe një frakturë, ne duhet të hetojmë mundësinë e një vrasjeje. Dy patjetër që kërkojnë një hetim të plotë,” tha ai.
Dr. Sampson pretendon se frakturat e kockës hipoidale dhe kërcit janë të pranishme si në vetëvrasje ashtu edhe në vrasje.
Mospërputhjet e gjetura në tre milionë dosjet që lidhen me financierin, të publikuara më 30 janar, kanë nxitur më tej spekulimet rreth shkakut të vdekjes së Epstein.
Një deklaratë federale që njoftonte vdekjen e tij u shfaq në dokumentet e publikuara rishtazi, por ajo mbart një datë që duket se i paraprin momentit kur ai u gjet zyrtarisht i vdekur brenda qelisë së tij të burgut në Nju Jork.
Dokumenti, i lëshuar nga Zyra e Prokurorit të Shteteve të Bashkuara për Distriktin Jugor të Nju Jorkut dhe i datës së premte, 9 gusht 2019, thotë se Epstein ishte gjetur tashmë i pavetëdijshëm dhe i shpallur i vdekur.
Por të dhënat e burgut dhe llogaritë zyrtare tregojnë se Epstein nuk u zbulua i pavetëdijshëm deri në mëngjesin e 10 gushtit 2019, kur një oficer që po i sillte mëngjesin e gjeti atë në qelinë e tij.
Vdekja e financierit erdhi mes një kaskade dështimesh brenda një prej qendrave më të sigurta të paraburgimit të qeverisë federale.
Të dhënat e burgut tregojnë se rojet e caktuar për të monitoruar Epstein nuk kryen kontrollet e kërkuara gjatë orëve të natës para se të zbulohej trupi i tij.
Sipas gjetjeve zyrtare, kontrollet e planifikuara në orën 3 dhe 5 të mëngjesit nuk u kryen siç duhet.
Për më tepër, kamerat e pozicionuara jashtë qelisë së Epstein nuk funksiononin siç duhet atë natë.
Hetuesit më vonë konfirmuan se të paktën dy kamera mbikëqyrjeje kishin funksionuar keq, duke lënë boshllëqe kritike në monitorimin vizual të zonës.
Për shkak të këtyre dështimeve, zyrtarët nuk ishin në gjendje të përcaktonin një afat kohor përfundimtar të momenteve të fundit të Epstein.
Sipas një raporti zyrtar, një lak i bërë nga një çarçaf portokalli i zbuluar në qeli u përcaktua më vonë se nuk ishte përdorur në vdekjen e Epstein.
Dr. Baden pretendoi se e vuri re këtë fakt gjatë autopsisë dhe ishte i shqetësuar në atë kohë se “laku nuk përputhej me [lëndimin]. Nuk ishte i lëmuar si çarçafi, shenjat [në qafën e Epstein] do të kishin kërkuar një lloj tjetër materiali”, tha ai.
Ai gjithashtu pretendoi se provat kritike u zhdukën për shkak të gabimeve të bëra nga zyrtarët në trajtimin e trupit të Epstein.
“[Ata] e zhvendosën trupin, rojet refuzuan të thoshin se si u gjet trupi dhe ai u transferua në spital”, gjë që ai pretendon se është një zinxhir ngjarjesh “shumë i pazakontë”.
Më e rëndësishmja, thotë Dr. Baden, koha e vdekjes së Epstein ishte “ngatërruar”. Deri më sot, nuk është përcaktuar asnjë kohë zyrtare e saktë e vdekjes.
Epstein, 66 vjeç, u mbajt në burgun e Manhattanit që nga arrestimi i tij më 6 korrik 2019, pasi prokurorët federalë e akuzuan atë për trafikim seksual të të miturve dhe komplot.
Ai u deklarua i pafajshëm dhe ishte në pritje të gjyqit kur vdiq në paraburgim pak më shumë se një muaj më vonë.
Sipas rrëfimeve zyrtare të mëngjesit të 10 gushtit, Epstein u gjet pa ndjenja dhe personeli mjekësor u përpoq ta ringjallte, por ai u shpall i vdekur menjëherë pas kësaj.
Dosjet e publikuara së fundmi pohojnë se rojet e burgut që mbikëqyrnin Epstein përdorën një trup si karrem për të mashtruar gazetarët e mbledhur jashtë burgut pas vdekjes së tij.
Kufoma e tij e vërtetë u hoq fshehurazi në një automjet të veçantë, pretendojnë dokumentet.
Sipas një memoje të brendshme, një mbikëqyrës burgu u tha agjentëve të FBI-së se stafi në Qendrën Korrektuese Metropolitan të Manhattanit e organizoi hilenë për shkak të një pranie të fortë mediatike pas asaj që u duk një vetëvrasje e Epstein.
Dosjet pretendojnë se kutitë dhe çarçafët u rregulluan për t’i ngjarë një trupi njeriu dhe u ngarkuan në një furgon të bardhë që dukej se i përkiste Zyrës së Kryemjekut Ligjor, duke i bërë gazetarët ta ndiqnin atë ndërsa largohej.
Pa dijeninë e medias, trupi i vërtetë i Epstein u vendos në një automjet të zi që e la objektin “pa u vënë re”, duke u lejuar oficerëve të transportonin kufomën privatisht.
Mashtrimi i dyshuar u krye pasi një zyrtar paralajmëroi rojet për numrin e madh të gazetarëve të mbledhur jashtë burgut.
Dosjet zbulojnë gjithashtu se hetuesit nxorën në pah një shënim të shkruar me dorë të gjetur brenda qelisë së Epstein në kohën e vdekjes së tij, i cili nuk u trajtua si një shënim vetëvrasjeje nga mjeku ligjor.
Shënimi, të cilin hetuesit e quajtën “të vështirë për t’u lexuar”, dukej se rendiste disa ankesa në lidhje me kushtet e burgut, duke përfshirë ankesa për ushqimin, dushet dhe insektet.
Pasi Epstein u shpall i vdekur në spital, trupi i tij u kthye në paraburgim federal në burg ku u bënë rregullimet për transferimin e tij në Zyrën e Kryemjekut Ligjor. ©Përgatiti LAPSI.al
