Gëzim Saliu
Nishani: BE destinacioni i vetëm i yni, përshëndesim hapat e Greqisë në lidhje me Kosovën
Kryeparlamentari grek Vangelis Meimarakis deklaron se marrja e statusit të vendit kandidat të Shqipërisë në qershor, bazuar në rekomandimin pozitiv të Komisionit Evropian, një sfidë prioritare edhe për Presidencën Greke. I gjendur në Shqipëri, në kuadër të pjesëmarrjes në punimet e Konferencës së XII-të të Kryetarëve të Parlamenteve të vendeve anëtare të Nismës Adriatiko-Joniane, kreu i parlamentit të Greqisë bëri të ditur se ashtu siç vendi i tij ndihmoi Shqipëria të anëtarësohet në NATO, do të bëjë ç’është e mundur që ajo të bëhet kandidate për në BE në qershor të këtij viti.
Takimi me Nishanin
Në takimin me kryetarin e Parlamentit të Republikës greke, Vangelis Meimarakis, Presidenti i Nishani deklaroi se Bashkimi Evropian mbetet destinacioni i vetëm për Shqipërinë . “Një objektiv strategjik që do të arrihet falë rezultateve tona dhe ndihmës së partnerëve tanë, ndër të cilët Greqia zë një vend të rëndësishëm. E konsideroj me fat faktin që Greqia mban Presidencën e Bashkimit Evropian në një moment kur ne presim me të drejtë marrjen e statusit të vendit kandidat në muajin qershor”, tha ai. Po ashtu në këtë takim, Nishani dhe Kryeparlamentari Meimarakis shkëmbyen mendime për ecurinë e situatës ekonomiko-financiare në Greqi dhe vlerësuan lart qytetarët dhe institucionet e vendit fqinj për përgjegjshmërinë dhe sakrificat në përballimin e sfidave dhe kapërcimin e situatës së rëndë. Në lidhje me episodet e rënda, ndodhur së fundi në burgjet greke, si Nishani ashtu edhe Meimarakis vunë në dukje se, : “këto incidente, sado serioze, nuk duhet dhe nuk mund të cenojnë marrëdhëniet mes vendeve dhe popujve tanë dhe shprehën besimin e plotë në trajtimin e tyre me objektivitet nga institucionet e vendit fqinj dhe se ata do të japin drejtësi”. Nga ana e tij, kreu i shtetit vlerësoi edhe hapat e ndërmarra nga Parlamenti grek dhe institucione të tjera të vendit fqinj në lidhje me qasjen ndaj Kosovës, një realitet, që po shërben sipas tij në stabilitetin dhe qetësimin e rajonit, veçanërisht pas fillimit të bisedimeve me Serbinë për normalizimin e marrëdhënieve ndërmjet dy vendeve.
Kryeparlamentari Meta
Në konferencën e përbashkët për shtyp me homologun grek, kryeparlamentari Meta theksoi se duke nisur nga fakti se vizita po realizohej gjatë presidencës Greke të BE-së, ajo ka sipas tij edhe dimensionin saj evropian. “Ne i kemi shprehur mirënjohjen tonë të thellë që Greqia i ka dhënë dhe vazhdon ti japë mbështetjen e saj axhendës sonë evropiane. Greqia si një vend i BE përfaqëson edhe një avokat të rëndësishëm të perspektivës evropiane të rajonit tonë dhe vlerësojmë përkushtimin e saj për të përshpejtuar integrimin Europian të rajonit përfshirë këtu edhe Kosovën e cila gjithashtu e ka vendin në BE. Shqipëria dhe Greqia si dy anëtare të NATO-s kanë një përgjegjësi të veçantë për forcimin paqes sigurisë dhe stabilitetit”, tha Meta. Ndërkohë kreu i Parlamentit grek tha se vendi i tij ka treguar me vepra që e do integrimin e rajonit në BE dhe NATO, integrim që theksoi Meiramakis, do të ndihmojë në stabilitetin, sigurinë dhe zhvillimin e rajonit, në interes të qytetarëve. “Me këtë vizitë dërgojmë një mesazh optimizmi se marrëdhëniet tona janë të shkëlqyera karakterizohen si strategjike. Një mesazh që u dërgojmë jo vetëm qytetarëve por të gjithëve që dy vendet tona duhet ë bashkëpunojnë për të mirën e zhvillimit dhe ka shumë mundësi që këtë mesazh ta japim ne”, theksoi kreu i Parlamentit grek.
Takimi me Merimarakis/ Basha: Angazhim për të zgjidhur çështjet e mbetura pezull, thellim bashkëpunimit
Kryetari i Partisë Demokratike Lulzim Basha priti dje kreun e parlamentit grek Vangelis Meimarakis, në një takim ku u diskutua për marrëdhëniet mes dy vendeve dhe procesin e integrimit europian të Shqipërisë, gjatë drejtimit të Presidencës së Bashkimit Europian nga Greqia. Basha vlerësoi mbështetjen e Greqisë për anëtarësimin e Shqipërisë në NATO dhe për lëvizjen e lirë të qytetarëve shqiptarë në zonën Shengen, dhe shprehu mirënjohjen për këtë mbështetje si dhe urimin që gjatë presidencës greke të BE-së, Shqipëria të marrë statusin e vendit kandidat. Duke u ndalur në marrëdhëniet shumë të mira mes dy vendeve, Basha tha se është bërë progres në lënien pas të problemeve të së shkuarës dhe zgjidhjen e shumë çështjeve që kishin mbetur pezull. Në këtë kuadër, ai bëri apel për angazhim të mëtejshëm të dy vendeve e qeverive për të zgjidhur dhe çështje të tjera, si ajo e pronave të qytetarëve çamë të shpërngulur pas luftës së dytë botërore. Po ashtu, kreu i PD-së vlerësoi vëmendjen e autoriteteve greke ndaj momenteve të veçanta siç ishte rasti fatkeq i Ilia Karelit, dhe shprehu bindjen se drejtësia e vendit fqinj do të bëjë punën e saj për zbardhjen e ngjarjes. “Ndonëse marrëdhëniet mes dy vendeve janë shumë të mira ka ende potenciale të pashfrytëzuara për të thelluar dhe konsoliduar më tej këto marrëdhënie, dhe se për këtë duhet të mbizotërojë vullneti i mirë politik dhe vendosmëria për të hapur një kapitulli të ri bashkëpunimi edhe më të ngushtë e të frytshëm në të gjitha fushat”, deklaroi Basha. Më tej, duke vlerësuar përkushtimin e Greqisë ndaj perspektivës europiane të Europës Juglindore, kreu i opozitës shprehu bindjen se njohja formale e Kosovës nga shteti helen do të shërbejë për konsolidimin e proceseve integruese në Ballkanin Perëndimor.
Rrugët/ Haxhinasto: Teknologji moderne për verifikimin e cilësisë
Ministri i Transportit dhe Infrastrukturës Edmond Haxhinasto inspektoi cilësinë e punimeve në segmentin rrugor Plepa-Kavajë-Rrogozhinë, ku tha se ka filluar një proces të vlerësimit i të gjithë punimeve me një teknologji modern. “Kështu që do të kemi një ide të qartë për gjithçka që është bërë dhe si është bërë me qëllim që kjo të na shërbej edhe për të ardhmen, për të rritur standardin dhe cilësinë e realizimit të veprave publike siç janë rrugët e Shqipërisë”, tha ai. Duke përfituar nga kjo vizitë, Ministri edhe një herë theksoi demosdoshmërinë e vendosjes së elementeve të sigurisë dhe sinjalistikës në veprat e infrastrukturës rrugore. “Shumë shpejt këtu do të realizohe punimet që lidhen me elemente të sinjalistikës dhe të sigurisë së rrugës,” deklaroi ministry.
