Gëzim Saliu
“Riaktivizimi i trafiqeve të drogës drejt vendeve fqinje, cenon sigurinë dhe imazhin e vendit”
Grasso: Shqipëria, magazinë droge, pasuritë e organizatave kriminale t’u jepen të varfërve
Kryetari i Partisë Demokratike, Lulzim Basha, zhvilloi dje një takim me Presidentin e Senatit italian, Pietro Grasso, ku ndau pikëpamjet se vetëm konsolidimi i shtetit ligjor dhe institucioneve të pavarura është rruga për t’u bërë ballë sfidave të luftës kundër krimit dhe trafiqeve, korrupsionit dhe kapjes së segmenteve shtetërore përgjegjëse për zbatimin e ligjit. Në këtë kuadër kreu i demokratëve theksoi se riaktivizimi i trafiqeve të drogës nga Shqipëria drejt vendeve fqinje, dukuri që prek pothuajse çdo ditë dhe Italinë është i papranueshëm pasi cenon, sipas tij, rëndë sigurinë në vend dhe imazhin e Shqipërisë përballë partnerëve më të rëndësishëm evropianë.
Situata politike
Duke u ndalur tek zhvillimet në vend, kreu i PD-së i bëri të ditur Presidentit të Senatit italian se pasiguria juridike si rezultat i vendimeve arbitrare dhe shpesh të jashtëligjshme të qeverisë, si dhe moszbatimi i vendimeve të gjykatave nga ana e qeverisë ka dëmtuar shumë interesat e qytetarëve shqiptarë dhe të investitorëve të huaj. Duke marrë si shembull anulimin arbitrar nga qeveria të dhjetëra koncesioneve të ligjshme, transparente dhe konkurruese të sipërmarrësve italianë në vendin tonë, Basha tha: “Kjo dëmton klimën e biznesit, interesat e investitorëve italianë dhe qytetarët shqiptarë pasi shkurton në mënyrë dramatike vendet e punës”. Më tej, kryetari i Partisë Demokratike i shprehu Garssos mbështetjen e pakushtëzuar të opozitës për integrimin evropian të Shqipërisë dhe marrjen e statusit të vendit kandidat. Sa u përket marrëdhënieve dypalëshe, Basha pohoi vlerësimin më të lartë dhe mirënjohjen më të thellë për të gjithë mbështetjen politike, ekonomike e të gjithanshme që Italia i ka dhënë Shqipërisë gjatë gjithë kësaj periudhe, në të gjitha fushat, dhe në veçanti, në projektin madhor të anëtarësimit në BE. “Vlerësoj rolin prej partneri strategjik që Italia ka ruajtur në vazhdimësi në marrëdhëniet me Shqipërinë, duke u renditur për më se dy dekada në partnerin kryesor për sa u përket shkëmbimeve ekonomike dhe tregtare”, – theksoi kreu i PD-së gjatë bisedës me Presidentin e Senatit italian. Ndërkohë, ky i fundit në një takim me gazetarët bëri të ditur se Italia është e informuar dhe disponon fakte se Shqipëria është një vend potencial në prodhimin dhe trafikimin e lëndëve narkotike drejt Evropës. Ai theksoi se prej kohësh ai ka pasur informacione për trafikun e drogës dhe, sipas tij, pas hetimeve, ka rezultuar se ka ekzistuar një pikë grumbullimi droge mes Shqipërisë, Kosovës dhe Serbisë për t’i shpërndarë me pas në Evropë nëpërmjet detit dhe tokës. “Unë për situatën kriminale kam një informacion që para një viti. Por unë mund t’ju them se ka pasur një lloj kanali të madh të trafikut drogës nga Ballkani, nga deti dhe toka. Madje kemi bërë disa hetime, dhe na ka rezultuar se ka ekzistuar një pikë grumbullimi e drogës mes Shqipërisë, Kosovës dhe Serbisë, për t’i shpërndarë më pas në Evropë”, – tha ai. Ndërkaq, Grasso sugjeroi që pasuritë e organizatave kriminale, të cilat janë sekuestruar t’u ofrohen personave që kanë nevojë, veçanërisht në periudha të tilla krize. “Duhet që të sekuestrohen pasuritë e organizatave kriminale. Dhe këto t’u ofrohen personave që kanë nevojë, veçanërisht në periudha të tilla krize. Ne kemi informacion se po ndërmerren reformat e duhura”, – deklaroi Presidenti i Senatit italian.
Takimi me investitorët italianë/ Basha: Reduktim burokracive dhe taksa të ulëta, bëhuni pjesë e projekteve strategjike të Tiranës
Projektet për investitorët: Terminali multimodal, linja e tramit Kombinat-Kinostudio, projekti i menaxhimit të mbetjeve, parqet industriale dhe dhënia me koncesion e sistemit të parkimit
Kryetari i Bashkisë së Tiranës, Lulzim Basha, prezantoi dje para investitorëve italianë mundësitë që ofron kryeqyteti për investime, ku nënvizoi reduktimin e burokracive dhe taksat e ulëta. Në fjalën e tij, kryebashkiaku u ndal dhe në miratimin pas 25 vitesh të planit rregullator urbanistik të qytetit të Tiranës i cili nuk është vetëm planifikim urban por është edhe një pasaportë për një zhvillim ekonomik të qëndrueshëm, në respekt të mjedisit dhe të cilësisë së jetës në kryeqytet. “Bashkia e Tiranës ka ndërmarrë në mënyrë pro-aktive masa për një qëndrim sa më mbështetës ndaj biznesit në tërësi, investitorëve në veçanti, masa të cilat shkurtimisht janë përkthyer në eliminimin e 60 tarifave lokale, uljen maksimale sipas rregullave të autonomisë vendore të taksave të Bashkisë së Tiranës por edhe eliminimin për 5 vjet nga çdo taksë lokale të çdo investimi që punëson 50 apo më shumë individë, qytetarë të Tiranës”, – theksoi ai. Në këtë takim, Basha ftoi investitorët italianë të bëhen pjesë e realizimit të projekteve strategjike të qytetit, gara për të cilat nis brenda dy muajve në vijim, siç është terminali multimodal, linja e tramit, menaxhimi i integruar i mbetjeve, ndriçimi i qytetit etj.
Projektet
Kreu i Bashkisë së Tiranës bëri të ditur se terminali multimodal i pasagjerëve është një projekt me një skemë koncesionare financimi të përllogaritur në të gjitha fazat deri në 40 milionë euro. “Qëllimi i projektit është t’i japë një zgjidhje përfundimtare disiplinimit dhe ofrimit cilësor të shërbimit të transportit në Tiranë dhe integrimit të tyre, trenit, transportit urban dhe interurban me autobus, taksive, parkim për automjetet private si dhe i lidhur me projektin e tramit në Tiranë, edhe nisja apo terminimi (varet se nga cila pikë shikimi e vështron) e linjës jug-veri të tramit të Tiranës”, – deklaroi Basha. Më tej, duke bërë të ditur se në Tiranë janë organizuar dy takime me investitorë potencialë që kanë treguar interes për këtë projekt. Nga ana tjetër, Basha u bëri të ditur investitorëve italianë se në muajin qershor do të hapet gara për linjën e tramit Kombinat-Kinostudio. “Janë përcaktuar linjat përkatëse dhe për njërën prej tyre lindje-perëndim me gjatësi 8.4 km ka përfunduar fizibiliteti dhe faza e parë e projektimit. Linja përllogarit në fazën e parë 90 mijë pasagjerë në ditë, me një perspektivë të dyfishimit të numrit deri në 186 mijë pasagjerë në ditë, me një kthim të brendshëm prej 12%, dhe këtu dua të theksoj se është konservator sepse merren kosto relativisht të larta të fabrikimit të vagonëve, të trenave. Edhe këtu, skema është koncesionare apo partneriteti publik – privat. Gara pritet të hapet në mes të qershorit. Natyrisht për financimin e një projektit të tillë pritet dhe është i nevojshëm edhe angazhimi i qeverisë shqiptare, përmes mekanizmave të garancisë sovrane të financimit për të cilën jemi në komunikim, do të jemi në komunikim me dikasteret përkatëse”, – u shpreh kryebashkiaku. Ndërkaq, një tjetër projekt për realizimin e të cilit Basha ka ftuar investitorët italianë, është dhe projekti i menaxhimit të mbetjeve urbane, i cili është hartuar në bashkëpunim me Korporatën Financiare Ndërkombëtare. Në projektet e tjera, kryebashkiaku përmendi parqet industriale, ku tha se Bashkia e Tiranës ka kapacitet për të ndihmuar në fazën e planifikimit të zhvillimit të parkut industrial si dhe te mbështesë me infrastrukturën e nevojshme si rrugë, ujë, kanalizime. “Projekti i ndriçimit të qytetit, zëvendësimi konvencional me teknologjinë më të fundit (LED) është po kështu një interes madhor i Bashkisë së Tiranës për të cilin presim, shprehje të interesit nga përfaqësuesit e biznesit”, – deklaroi Basha, duke shtuar se është në përfundim i gjithë dokumentacioni dhe procedurat për dhënien me koncesion të sistemit të parkimit të Tiranës.
