Një lajm i raportuar ditën e sotme u bë më shumë subjekt humori dhe ironie në rrjetet sociale, duke treguar se ku është katandisur puna e SPAK.
Gjykata e Posaçme Kundër Korrupsionit dhe Krimit të Organizuar dënoi me 120 orë punë të detyrueshme në komunitet Vilson Meminin. Ai akuzohej për “korrupsion aktiv të personave që ushtrojnë detyrë publike”. Memini u vu nën hetim nga ana e Prokurorisë së Posaçme, pasi tentoi të korruptonte një efektiv policie duke i dhënë 1 mijë lekë të reja.
Ky është vendimi i parë që GJKKO dënon një person të akuzuar për korrupsion.
Kaq ka mjaftuar për të shpërthyer humori. Por ky është një humor i zi, pasi shumë dosje të bujshme ose janë shfryrë nga SPAK, ose janë lënë në harresë.
Mes tyre spikasin dosjet për krimet zgjedhore, që janë një kërkesë e kancelarive ndërkombëtare për integrimin evropian të vendit.
Për ironi, në fillim të këtij muaji u miratuan dy nisma që i jepnin SPAK mundësinë që të hetonte krimet zgjedhore pas marrëveshjes së miratuar mes palëve më 5 qershor.
Por ish-ministri i Brendshëm, Fatmir Xhafaj ishte kundër faktit që SPAK të hetojë krimet zgjedhore.
Struktura e posaçme nuk duhet ngarkuar shumë, u tha në atë kohë. E megjithatë duke hetuar 10-mijë lekësha, kur kostoja e të gjithë gjyqit shkon miliona, SPAK është bërë më shumë se qesharak.
