Në kërkim të planetëve të banueshëm jashtë sistemit tonë diellor, NASA mendohet se ka bërë një zbulim të rëndësishëm.
Sateliti kërkimor i NASA-s, i quajtur Tess, ka identifikuar një eksoplanet të quajtur TOI 700D.
Ai është i krahasueshëm në përmasa me Tokën dhe mendohet se ka ujë të rrjedhshëm. Këtë e bëri të ditur NASA në takimin e përvitshëm në Havai.
NASA u ndihmua në këtë mision edhe nga astronomë amatorë. TESS fillimisht nuk e kishte klasifikuar siç duhet këtë planet. Por astronomët e tjerë zbuluan gabimin.
Pas korrigjimit të parametrave u zbulua se planeti është më i vogël në përmasë nga sa ishte menduar fillimisht dhe gjendet në një zonë të banueshme.
Eksoplanetet janë zbuluar edhe në të shkuarën, veçanërisht nga teleskopi Kepler. Por kjo është hera e parë që Tess, që nisi misionin në vitin 2018, bën një zbulim të tillë.
