E patë qytetërimin, njerëzit? Ishte në tentativë skandali, dhe dy veta dhanë dorëheqjen. Nuk pritën gjykatat, ata, se gjerat zgjidhen politikisht”.
Çlirim Gjata, sekretari për Çështjet Ligjore të PD-së, i referohet vendimit për zgjedhje të parakohshme në Austri, pas një skandali përgjimesh.
“Këtë po kërkojmë përditë në protestë edhe ne, ajo është Evropa ku kërkojmë të shkojmë”, thotë ai.
Edhe pse Qeveria duket ende e sigurt mbi zhvillimin e zgjedhjeve më 30 qershor, Gjata deklaron se kjo është e pamundur, tashmë “çështje e mbyllur”.
Por kjo nuk do të thotë që demokratët nuk po përgatiten, dhe kështu interpretohet edhe dërgimi i anëtarëve në KZAZ-të.
“Ne pamë që po bëhen manipulime në regjistrimin e kandidatëve. Do të ishte një problem edhe kur zgjedhjet të shtyhen, se kandidatët ato do të jenë”, thotë Gjata.
Në këtë pikë ai kërkon që KQZ të mos shprehet politikisht, të qëndrojë teknike dhe mos t’i japë mend kujt, se kush është parti parlamentare dhe kush jo.
Qëndrimit të Qeverisë mbi datën e zgjedhjeve, ai i përgjigjet se “duhet të vëmë në balancë karrigen e kryeministrit me lëvizjen mbarë popullore që ka filluar. Ju mendoni që do të tërhiqet opozita? Po ndodhi, ajo shuhet”.
Sipas tij, opozita nuk mund të rrinte të shihte, duke mësuar edhe nga historia e Shqipërisë dhe Evropës. Sipas tij, një opozitë fasadë solli përplasjet që çuan në luftë civile Ukrainën, por edhe shembulli shqiptar i ’97-ës vinte nga një opozitë që “u zgjua vonë” dhe nuk menaxhoi situatën.
Gjata shton se “kush nuk mëson nga historia, ka fatin që ta përsëris prapë atë” dhe se pikërisht për të shmangur këtë përballje opozita kërkon që gjithçka të zgjidhet politikisht, me zgjedhje të parakohshme dhe pa Edi Ramën.
