Prokuroria e Apelit për Krime të Rënda iu drejtua me rekurs Gjykatës së Lartë të cilës i kërkon prishjen e vendimit të Apelit dhe rikthimin e dënimit me burgim të përjetshëm për Dritan Dajtin, i cili akuzohet për vrasjen e 4 oficerëve të policisë në 2009 në Durrës.
Pak ditë pas vendimit të Gjykatës së Apelit të Krimeve të Rënda që shpëtoi nga burgu përjetë Dritan Dajtin, një tjetër hap është hedhur nga akuza.
Dajti pas një kalvari 10-vjeçar përballjeje me drejtësinë, përfundimisht u dënua me 25 vite burgim për shkak se Apeli i Krimeve të Rënda pranoi kërkesën për gjykim të shkurtuar.
Pas vendimit që u konsiderua skandal, prokuroria nisi hetimet për 3 nga 5 gjyqtarët e çështjes “Dajti”, me vendim gjykate u ushtrua kontroll në banesat e gjyqtarëve Skënder Damini, Petrit Aliaj dhe Aleks Nikolli. Në banesën e Daminit u gjetën 17 mijë euro dhe disa fishekë. Lidhur me paratë gjyqtari pretendon se i përkasin të birit dhe i është drejtuar gjykatës me kërkesën për kthimin e tyre.
Njëherazi prokuroria ka sekuestruar telefonat celularë të 3 gjyqtarëve dhe i ka dërguar ato për ekspertizë me qëllim zbulimin e kontakteve që mund të kenë patur ata me persona të njohur me Dajtin që mund të kenë ndikuar.
Në kuadër të hetimit, prokuroria ka sekuestruar edhe librat e hyrje-daljeve në paraburgim, duke listuar emrat e personave që janë takuar me Dritan Dajtin, të cilët pritet të merren në pyetje. Pas kalvarit në gjatë të përballjes me drejtësinë, Dajti ia doli të hiqte nga supet burgimin e përjetshëm dhe përfundimiisht u dënua me 25 vite burgim, për atë që u konsiderua si masakra e Durrësit.
