Ja ‘plas’ studenti i Juridikut: Ti hiqet doktoratura Ulsi Manjës, ja si do të përshkallëzohet protesta në Janar!

0
96

Yllhan Hoxhaj, student në vitin e tretë pranë Fakultetit të Drejtësisë në Universitetin e Tiranës ka qenë sot i ftuar në studion e lajmeve të Fax News, për të treguar sesi do të vijojë më tej protesta studentore.

Ai ka treguar dhe problematikat që ndeshen në fakultetin ku ai studion, teksa është shprehur se turi i ”dialogut” të kryeministrit Edi Rama është një farsë, pasi në të marrin pjesë të rinjtë që nuk kanë qenë pjesë e protestave 17 ditore.

“Unë jam në vit të tretë në Fakultetin e Drejtësisë, problematikat me të cilat ndeshemi janë nga më të shumtat. Ka pedagogë që nuk janë në nivelin e duhur, dhe nuk arrijnë të përçojnë dijet e nevojshme. Doktoraturat që janë dhënë nga ky fakultet, kemi parë doktoraturën e Ulsi Manjas që thotë frika ruan vreshtat. Ky nuk është punim shkencor, i bëj thirrje dekanatit që kjo doktoraturë të hiqet.

Kam miq që jetojnë në konvikt dhe kushtet janë të mjerueshme. Nuk kanë as ngrohje, dushet nuk punojnë, tualetet janë të përbashkëta. Studentët e ekselencës duhet që ti kenë notat 10:00, unë kam një mesatare mbi 9 dhe derimë tani nuk kam përfituar asgjë. Në universitet mund të kemi dhe nota për përmirësim, pasi program është shumë i ngjeshur, po kjo nuk na bën ne studentë ngelës, ashtu siç është shprehur kryeministri”, u shprej Hoxhaj në Fax News.

Ndërkohë sa i takon akuzave se protesta është marrë peng nga përfaqësues të politikës, ai e mohoi këtë fakt duke thënë se marrja e fjalës ka qenë e lirë për këdo. Hoxhaj ka treguar se sot do të jetë dita e fundit e protestës për këtë vit, dhe në Janar do të nisin ngujimet në fakultetet përkatëse nga studentët.

“Në janar ne do të ngujohemi në fakultetet përkatëse, ne nuk duam që të mos bëjmë mësim, ne kërkojmë që të dëgjohet zëri ynë për kërkesat që tashmë i kemi bërë publike. Ne kemi 16 ditë që qëndrojmë dhe e kemi kaluar proven, kështu që protesta nuk do të shuhet”, përfundoi studenti.

Web Agency, Digital Agency, Web Development Agency

LEAVE A REPLY

Please enter your comment!
Please enter your name here