Para gazetarit Blendi Fevziu, Xhisiela Maloku tha se gjithçka është zmadhuar dhe ekzagjeruar në mënyrë ekstreme. Ajo tha se nuk është kërcënuar kurrë dhe se denoncimin për Rexhep Rrahjan e ka bërë nga xhelozia.
Në një intervistë për “Opinion”, vajza e cila përgjatë gjithë këtyre ditëve ka qenë në qendër të vëmendjes, pasi dyshohej se ishte dhunuar nga djali i deputetit mohon që dëshmia e publikuar në media të jetë e saj dhe thotë se ajo është sajuar nga ish-oficeri Emiljano Nuhu.
“Unë kam prej 10 vitesh shoqëri me të, pas datën 21 korrik nuk jam përballur me të, vetëm në Prokurori, nuk jam kërcënuar nga ai. Unë e kam bërë gjithçka nga xhelozia“, tha Maloku.
E pyetur nga gazetari Fevziu se përse e tërhoqi denoncimin e bërë në polici, 25-vjeçarja tha se e bëri ngaqë arriti të rregullonte marrëdhëniet me ish-të dashurin.
Pra i bie që jeni tallur me policinë? e pyeti Fevziu. “Po”, u përgjigj Xhisiela, duke shtuar se nuk ka qenë kurrë e kërcënuar e madje se Rexhepi i kishte ofruar mbështetje.