Në Kuvendin e Shqipërisë po zhvillohet seanca parlamentare e së enjtes, e dyta për këtë sesion parlamentar, por pa praninë e opozitës.
Vetëm deputetët e mazhorancës kanë hyrë në salllë dhe kanë nisur diskutimin sipas rendit të ditës. I pari e ka marrë marrë fjalën Ministri i Ekonomisë Arben Ahmetaj lidhur me aktin normativ për Buxhetin e vitit 2018.
Opozita ndërkohë i është drejtuar qytetit të Elbasanit për një takim të jashtëzakonshëm për të sensibilizuar opinionin për situatën e rëndë kriminale në vend.
Jo më larg se mbrëmjen e së mërkurës, kryetari i opozitës Lulzim Basha deklaroi se nuk do të bëjnë luftë me bandat, por me qeverinë që i mbështet ato.
“Ne nuk kemi punë me krimin në politikë, – tha Basha në “Fakt”, – se ne nuk kemi as Polici, as Xhandarmëri tonën, por ne kemi punë me qeverinë që është gjysma e bandës.
Ne me bandat, luftë nuk bëjmë dot, por me qeverinë që mbështet bandat po! Luftë politike deri në rrëzimin e saj dhe zëvendësimin e saj me një qeveri e cila ka vullnetin, planin dhe vendosmërinë për të rivendosur rendin publik, për të çliruar Shqipërinë nga zgjedha e krimit të organizuar dhe për t’i dhënë Shqipërisë një cikël normal sigurie, rendi dhe zhvillimi ekonomik.
Jo luftë me bandat, por luftë me qeverinë që mbështet bandat!
Sepse siç e thashë, partia politike nuk është detashment ushtarak, nuk është polici alternative, nuk ka forcë paramilitare, por luftë politike me qeverinë për ta zëvendësuar bashkëqeverisjen me krimin me një qeveri që e lufton, që ndëshkon dhe nuk e mbron e bashkëpunon me krimin.”
