Grupi ndërministror qeveritar dhe kompania koncesionare e rrugës Milot-Morinë kanë përmbyllur procesin e negociatave, duke dalë me një formulë konkrete për tarifimin preferencial të banorëve të Qarkut të Kukësit, autobusëve të linjës dhe përdoruesve të shpeshtë. Kështu, burimet nga grupi negociator sqarojnë se të gjitha automjetet e regjistruara në Qarkun e Kukësit do të paguajnë një tarifë prej 100 lekë me TVSH për një kalim. Ndërsa përdoruesit e Qarkut të Kukësit do të parablejnë përmes telepass në mënyrë të përshkallëzuar deri në 44 kalime në muaj me këtë tarifë të reduktuar. Mirëpo, reduktimi i tarifës do të prekë gjithashtu edhe linjat e transportit publik, që kryejnë udhëtime nga dhe për në qytetin e Kukësit. Tarifa e tyre e kalimit do të jetë gjithashtu 100 lekë me TVSH për një kalim. Ndërkohë që kategoria e tretë përfituese e tarifave të lehtësuara është ajo e përdoruesve të shpeshtë të rrugës, ku përfshihen qytetarët e Shqipërisë dhe ata të Kosovës, të cilët e përdorin aksin rrugor në mënyrë të vazhdueshme. Parimi i vendosur është ai i reduktimit të tarifës në varësi të numrit të udhëtimeve. Pra, sa më shumë të udhëtosh aq më shumë përfiton nga ulja. Megjithatë, pas bisedimeve të zhvilluara me përfaqësuesit e biznesit të Kosovës dhe Shqipërisë, duket se qeveria ka pranuar propozimin e tyre për të shtyrë rinisjen e zbatimit të tarifës në Rrugën e Kombit pas përfundimit të sezonit turistik. Mësohet se është rënë dakord që kalimi me pagesë të nisë më 17 shtator. Ndërsa fatura për politikat lehtësuese do t’i kaloje buxhetit të shtetit, i cili për 30 vite do ti paguaj koncesionarit 48.5 milion euro. Sidoqoftë, aplikimi i tarifës së Rrugës së Kombit nuk është se vjen për herë të parë. Tentativa e parë qeverisë dhe koncesionarit për të nisur mbledhjen e taksës më 1 Prill 2018 shkaktoi një revoltë të dhunshme të banorëve të Kukësit të cilët shkatërruan dhe dogjën stacionet nga ku do të bëhej pagesa. Ndërkohë që disa ditë më pas kryeministri Edi Rama u kërkoi ndjesë kuksianëve për mos informimin e duhur në lidhje me tarifat që do të aplikoheshin për banorët lokal. “Nuk do të rifillojë pagesa pa gjetur zgjidhjen më të mirë të mundshme”, premtoi kryeministri Edi Rama.
