Në Shkodër do të ndërtohet monumenti që përkujton persekucionin komunist në Shkodër. Kjo përcaktohet edhe në buxhetin për vitin 2018, ku janë përcaktuar fondet që do të përdoren për ndërtimin e monumentit.
Bashkia e Shkodrës e drejtuar nga Voltana Ademi ka vendosur që monumenti të ngrihet atje ku sot gjendet busti i “Rozafatit”, ndërsa punimet do të zgjasin dy vjet.
Investimi do të vijë si bashkëfinancim dhe kap vlerën e 3.282.000 lekëve të reja.
Në propozimin e bërë, Bashkia e ka shoqëruar me relacionin përkatës këtë nisëm, duke sqaruar edhe arsyet e këtij vendimi: “Qyteti i Shkodrës është qyteti më i persekutuar gjatë diktaturës komuniste. Regjimi komunisti në Shqipëri filloi në vitin 1944 dhe zgjati për 45 vite rrjesht. Gjatë kësaj periudhe në qytetin e Shkodrës numërohen 3000 të burgosur politikë, 2000 të internuar, 601 të pushkatuar dhe 136 persona të vdekur në tortura. Në qytetin tonë nuk ka një memorial, i cili përkujton këto viktima. Në vitin 2014 Komisioni Drejtësi dhe Paqe në bashkëpunim me Bashkinë Shkodër, Shoqatën e ish të përndjekurve politikë Shkodër, Galerinë e Arteve si dhe mbështetur nga organizatat gjermane RENOVABIS dhe Maksimilian Kolbe, ka realizuar një konkurs për realizimin e një vepre që përkujtonte persekucionin komunist në Shkodër.
Në këtë konkurs morën pjesë skulptoret më të njohur në Shqipëri. Komisioni vlerësues i përbërë nga një juri me artistë profesionistë Jorg Luer, Luigj Mila, Filip Guraziu, Ndricim Muja, Agim Kadillari, Sytki Brahim dhe Tomi Nika, kanë vlerësuar si projekt fitues veprën e paraqitur nga skulptorët Hashim dhe Petrit Kruja. Këshilli Bashkiak me anë të një vendimi ka miratuar dhe hapësirën e caktuar për ta vendosur memorialin që gjendet në lulishten përballë Bashkisë Shkodër. Fotoja e këtij materiali është në vijim të kësaj fishprojekti. Bashkia Shkodër do të bashkëfinancojë bashkë me Shoqatën e të persekutuarve politike dhe donatorë të ndryshëm për realizimin e këtij monumenti”.