Tinka Kurti ikona e kinematografisë shqiptare do ta festojë 85-vjetorin e lindjes në Teatrin “Migjeni” në Shkodër, ku hodhi hapat e para të karrierës së saj. “Tinka Kurti pa me te voglin dyshim, është emri më i ndritshëm në qiellin e filmit, por edhe teatrit shqiptar. Një përvjetor i tille, nuk kishte si te kalonte pa vemendjen e duhur e te merituar te Shkodres, emrin e te ciles Tinka e ngjiti ne piedestalin e artit shqiptar”, shkruhet në njoftimin zyrtar. Sipas drejtoreshës së institucionit Rita Gjeka, Bashkia Shkodër dhe teatri “Migjeni” kanë përgatitur për datën 17 dhjetor një mbremje të titulluar “Tinka e perjetshme”. Ndërsa aktiviteti do të nis në orën 11.00 të paradites në teatrin “Migjeni” festa do të vijojë në orën 18.00 me shfaqjen e filmit më të fundit ku luan aktorja: “Yjet e se ardhmes”. “ Të shkruash për biografinë artistike të Tinka Kurtit është e kotë. Ajo është gdhendur ne artin dhe vetëdijen tonë kombetare. Mbetet vetem t’i bashkohemi festes për nder të saj dhe ta urojmë: Te paçim sa më gjatë në mesin tonë o Tinka e perjetshme!”, shkruan stafi organizator i festës për 85-vjetorin e lindjes së Tinka Kurtit.
Tinka Kurti u lindi më 17 dhjetor 1932 në Sarajevë, Bosnjë Hercegovinës nga një baba Shqiptar me origjin nga Dukagjini i Shkodërs dhe një nënë Hungareze. Është më e madhja nga katër fëmijët. Aktualisht jeton në Tiranë. Familja e saj u shpërngul në Shkodër kur ajo ishte në moshë të vogël. Pjesën më të madhe të jetës e kaloi në Shkodër, ku edhe iu bashkua teatrit në moshë të re. U ngjit për herë të parë në skenë kur ishte vetëm 16 vjeç. Për disa vjet u aktivizua në teatrin amator në Shkodër. Më 1947 u përjashtua nga Liceu Artistik i Tiranës dhe nuk mori asnjëherë ndonjë diplomë shkolle, por kjo nuk e pengoi të bëhet një aktore e madhe dhe e shumë e kulturuar. Që nga viti 1949 e deri sa doli në pension ishte aktore e Teatrit “Migjeni” të Shkodrës, ku interpretoi rreth 120 role. Veçanërisht e suksesshme në rolet e forta dramatike të nënave, por po kaq e suksesshme në komedi. Shkëlqen me role protagoniste në “Gjaku i Arbrit”, “Histori Irkutase”, “Toka Jonë” – ku luan në fillim Filen e pastaj Loken, “Fisheku në pajë” apo “Fejesa e Çehovit”. Kurti ka interpretuar edhe në kinema, në rreth 35 filma artistikë, duke filluar me filmin e parë shiptar të metrazhit të gjatë, “Tana”, më 1958. Ndër vepra të tjera janë Nënë Pashako tek “Yjet e netëve të gjata” (1972), nëna tek “Çifti i lumtur” (1975), Sinjorina Mançini tek “Vajzat me kordele te kuqe” (1978), Gjyshja tek “Zemra e nënës”. Tinka Kurti ka marrë çmime të shumta, si në festivalet kombëtare të filmit, ashtu edhe në ato të teatrit. Këtyre çmimeve u shtohen edhe vlerësime të tjera të rëndësishme, si medalja “Mjeshtër i Madh i Punës”, akorduar nga Presidenti i Republikës. Dy kinema, një në Tiranë dhe një në Durrës mbajnë emrin e saj. Gjithashtu, emrin e Tinka Kurtit mban edhe një shkollë në fshatin Lekbibaj në Shqipëri. Në vitin 2003, regjisori shqiptar Esat Teliti realizoi një dokumentar të titulluar thjesht “Tinka” kushtuar jetës së saj.