Deputetja demokrate Albana Vokshi deklaroi gjatë fjalës së sotme në parlament se ka marrë një mesazh në Facebook përmes së cilës e kanë njoftuar se në Berat një fëmijë 3 – vjeç ka humbur jetën si pasojë e gripit dhe ngjarja është mbajtur e fshehtë nga mediat dhe qeveria. Ajo pyeti kryeministrin dhe ministrin e shëndetësisë nëse, ka dijeni për ngjarjen dhe kërkoi hetim të mëtejshëm për këtë çështje. Deputetja u ndal gjatë tek situata problematike në shëndetësi, ndërsa theksoi se shefi i qeverisë ka ndërtuar një makinë propagande, për të mbuluar dështimet.
“Rama ngriti një makinë propagande me ngjyra. Diku përmend batuta bajate dhe të njerëzve të shquar, për të mbuluar komplekset e padijes. Përbuz qytetarët që i shkruajnë për hallet e tyre, u thotë ti që ke Facebook, nuk mund të jesh i varfër,” – deklaroi deputetja demokrate.