Kokaina vinte drejtpërdrejt nga Holanda në Valtrompia të Breshias, ku më pas trafikohej në gjithë Italinë.
Kjo ndodhte deri pak ditë më parë, kur efektivët e “Guardia di Finanza” kanë arrestuar dy shqiptarë, një prej tyre me banim në Concesio dhe tjetri në Spezia, raportojnë sot mediat lokale.
Dy shqiptarët identiteti i të cilëve nuk bëhet ditur, ishin organizatorët e trafikut të drogës, raporton “Corriere della Sera”.
Kokaina vinte në Itali me makinë, e fshehur në parakolp dhe në sediljet e pasme. Ky është rasti i veturës së ndaluar në 11 gusht në Valtrompia. Në një BMW me targa angleze, agjentët e “Guardia di Finanza” kanë gjetur 10 pako me kokainë me një peshë më shumë se 10 kg.
Shoferi i mjetit, “korrieri” i organizatës, një 41-vjeçar shqiptar, u arrestua në flagrancë.
Arrestimi i tij, ka vënë në lëvizje dy kokat e organizatës, të cilët u larguan nga Italia. Por arratia e tyre zgjati deri pak ditë më parë, pas kthimit në Itali, ku u ndaluan dhe arrestuan.
Gjatë kontrollit në banesat e dy shqiptarëve, 32 dhe 27-vjeç, efektivët gjetën dhe sekuestruan një sasi droge, para dhe disa celularë.
Konkretisht, në banesën në Concesio, ishin fshehur 300 gramë kokainë dhe më shumë se 30 mijë euro.
