Kreu i Qeverisë shqiptare, Edi Rama, është ndalur tek kriza e refugjatëve, gjatë bisedimit në Kryeministri me ish-homologun e tij italian, Massimo D’Alemo.
Në fjalën e tij, Rama u shpreh se ajo që ndodhi në Ballkan ishte një spektakël i trishtueshëm. Rama tha se mënyra se si u administrua kriza e refugjatëve ishte kaotike, por theksoi se Shqipëria është e gatshme të marrë pjesën e përgjegjësisë që i takon.
Kryeministri Rama theksoi se Shqipëria nuk mund të hapë portat për refugjatët, nëse Europa nuk ka një plan për ta.
“Mënyra se si u administrua kriza ishte kaotike. Ajo që ndodhi në Ballkan ishte një spektakël i trishtueshëm, pasi ishte përcjellje nga një stacion në tjetrin. Refugjatët hyjnë në BE, (në Greqi) dalin në Maqedoni dhe hyjnë sërish në BE. Nuk ka zot që i mban në tenda, duan të shkojnë në Gjermani. Numri i refugjatëve nuk është dramë e madhe, por mënyra si shfaqen refugjatët është problem. Ne jemi gati të marrim pjesën tonë, por nuk mund të hapim portat dhe të ngecim në kurth”, tha kryeministri Rama.