Pranimi në universitete /Ja si do të funksionojë këtë vit, mesatarja dhe lëndët prioritare në llogaritjen e pikëve

Universitetet kanë të drejtë të përcaktojnë kuotat e studentëve fitues dhe këtë vit, në Universitetin e Tiranës do të ketë 10% më shumë pranime se një vit më parë.
Sejrie Baleta
Kandidatët që do të konkurojnë këtë vit për t’u pranuar në universitete, sipas ligjit të ri të arsimit të lartë do të duhet t’i nënshtrohen kritereve të vendosura nga vetë universitetet, për të kryer studimet ose jo. Ndryshe nga vitet e kaluara, nuk do të jetë më muaji shtator koha e shpalljes së fituesve por muaji korrik, menjëherë pas përfundimit të maturës shtetërore. Ndërkohë që, sipas ligjit të arsimit të lartë janë universitetet që do të përcaktojnë kriteret e pranimit për kandidatët. Kule thotë se matura do të jetë një provim dalës, që mbyll një cikël studimesh. “Provimet e maturës shtetërore nuk kanë peshë të veçantë, ato përfshihen si një provim i thjeshtë. Maturanti ka bërë 3 matematika në 3 vite, bën dhe provimin në maturë shtetërore dhe bëhet mesatarja e 4 notave. Pra, matura ka të njëjtën peshë sikurse çdo notë tjetër që është në dëftesën e maturantëve”, nënvizon Kule. Universitetet kanë të drejtë të përcaktojnë kuotat e studentëve fitues dhe këtë vit, në Universitetin e Tiranës do të ketë 10% më shumë pranime se një vit më parë. Në muajin korrik do të shpallen fituesit për çdo universitet. Kështu, nëse një kandidat do të konkurojë në Universitetin e Tiranës, Fakultetin e Ekonomisë duhet të ketë aftësi të mira në matematikë, ekonomi, fizikë e gjuhë të huaj. Kjo pasi, këto lëndë do të kenë 50% të peshës së pikëve që do të sigurojë kandidati ndërsa 50% do e zënë nota mesatare e tre viteve. Universiteti i Arteve dhe i Sporteve do të jenë universitetet e vetme që do të kenë konkurse. Kandidatët do të duhet të konkurojnë në bazë të aftësive që kanë, në lidhje me profilet që do të zgjedhin. Universiteti i Tiranës ka përcaktuar 50% mesataren e tre viteve përfshirë edhe notat në provimet e maturës dhe 50% e ka mesatarja e grup-lëndëve, sipas drejtimeve që ka Universiteti i Tiranës, në lidhje me degët që ofron. Ndërkohë që nuk do të ketë konkurs për studentët e rinj. Për universitetin e Mjekësisë, 35% do ta kenë notat e maturës shtetërore, 35% nota mesatare e tre viteve dhe lëndët formuese 30%, përkatësisht 10% kimia, 10% fizika, 10% biologjia, sociologjia 2 % dhe filozofia 2%. Për ciklin e dytë të studimeve, nota mesatare do të jetë 8.5. Për degët si infermieri, mami, fizioterapi, imazheri, logopedi në ciklin e parë të studimeve, nota mesatare është përcaktuar 8. Për universitetin Politeknik, nota mesatare është propozuar nota 6. Ndërsa universitetet e rretheve, ende zyrtarisht nuk kanë bërë me dije kriteret e pranimit.
Diplomat shqiptare në Kosovë
Ndërsa pararelisht me bërjen publike të kritereve të pranimit të maturantëve në univëersitete e Tiranës ministrja e Arsimit, Lindita Nikolla ka zhvilluar një takim me homologun e saj të Kosovës, për të gjetur një zgjidhje mbi njohjen e diplomave që studentët kosovarë kanë marrë në Shqipëri. Ministri Arsim Bajrami tha se, javën tjetër pritet të dalë një udhëzim që i hap rrugë njohjes së diplomave që janë lëshuar nga universitetet jopublike e që deri më tani nuk janë njohur. Ndërsa nga ana tjetër ministrja Nikolla deklaroi se bashkë me ministrin Bajrami është zhvilluar një proces diskutimesh konstruktive në rrugën e standardit që kemi vendosur, atë të bashkëpunimit dhe koordinimit të punëve, në mënyrë që Shqipëria dhe Kosova të jenë së bashku në rrugën e integrimit të arsimit të lartë në hapësirën evropiane.