Atletico Madrid vazhdon të shpresojë për t’u shkaktuar telashe gjigantëve, Barcelona dhe Real Madrid, për titullin e La Ligas. Në javën e tetë të kampionatit spanjoll, të kuqtë fituan si mysafirë të Real Sociedadit me rezultat 0-2. Golin e vetëm në pjesën e parë e shënoi Antoine Griezmann (9’) dhe mysafirët shkuan në pushim me epërsi. Në minutat shtesë të sfidës, dy lojtarë vendas u përjashtuan me kartonë të kuq (Diego Reyes dhe Jonathas), ndërsa skuadra kryeqytetase e shënoi edhe një gol. Yannick Ferreira-Carrasco ishte realizuesi që vendosi rezultatin përfundimtar të takimit. Me këtë fitore, Atletico Madridi ka 16 pikë, dy më pak se Real Madridi dhe Barcelona.