Altin Vorpsi
Kryesuesit e Skënderbeut kanë arritur të fundosin Tomorin në fushën e tyre me rezultatin 4-2 në javën e 18 të Superligës. Të besuarit e Josës kanë qenë në sulm gjatë gjithë kohës dhe jo rastësisht shënuan katër gola
Skënderbeu është i përkryer. Përballë Tomorit në shtëpi nuk kishte si të ndodhte ndryshe. Ekipi i Josës mori të tria pikët, duke zhytur në terr beratasit që tashmë rrezikojnë seriozisht rënien nga kategoria. Po të njëjtin fat duket se do të ketë edhe Apolonia e Fierit, që dje u mund në Gjirokastër nga Luftëtari.
Në Korçë
Kryesuesit e Skënderbeut luajtën në fushën e tyre, para tifozëve të vet, ku prisnin beratasit e parafundit dhe të pashpresë për mbijetesë. Plot katër gola kanë realizuar të besuarit e Mirel Josës në katërkëndorin e mbrojtur nga Llani, ndërkohë që miqtë kanë arritur të kundërpërgjigjen dy herë në portën e Shehit. Të parët kanë kaluar në epërsi beratasit, me anë të Elmazit, por kuqebardhët kanë arritur të përmbysin gjithçka shumë shpejt e të kompletojnë në total pokerin e tyre, që shton 3 pikë të tjera në llogarinë e kryesuesve. Ka realizuar një dopietë Sebino Plaku, në formë të shkëlqyer sportive, ndërsa ka munguar në këtë ndeshje kroati Pero Pejiç. Numri një i pankinës korçare kishte theksuar se ekipi i tij duhej të ishte i përqendruar vetëm te kjo sfidë, pa menduar ato të radhës, në mënyrë që të përfitojë nga përballja direkte mes Flamurtarit dhe Teutës. Tomori, kundërshtari i korçarëve, ishte vlerësuar në maksimum në kampin bardhekuq. Fakti që në fazën e parë beratasit i patën ndalur korçarët, kishte bërë që impenjimi të ishte i madh tek të gjithë.
Në Fier
Apolonia e vendit të fundit udhëtoi drejt Gjirokastrës, ku u mund me rezultatin 3-2, për t’u ndeshur me bluzinjtë vendas. Edhe këta të fundit e shohin veten në pozita mjaft delikate, seriozisht të rrezikuar për të rënë nga kategoria, ndaj ky trepikësh ka ardhur në momentin e duhur dhe u jep moral për pjesën e mbetur të garës. Edhe pse kanë luajtur për minuta të tëra me një lojtar më pak, pas nxjerrjes me të kuqe të mbrojtësit Boçi, gjirokastritët kanë arritur të kalojnë barazimin e përkohshëm të miqve me anë të Dushkut, falë rrjetave të Fonsekës, Beqirit dhe Llukës. Ndoni (për fierakët) ka vulosur rezultatin përfundimtar 3-2 në favor të bluzinjve, që u japin goditjen fatale bardhejeshilëve të Demirajt dhe parakalojnë në klasifikim Shkumbinin.
Në Krujë
Transferta e Shkumbinit në Krujë nuk ka qenë e suksesshme. Goli i bukur i Kalarit në pjesën e dytë, shënuar nga një goditje dënimi, u ka mundësuar vendësve marrjen e tri pikëve të radhës. Peqinasit janë munduar shumë por kanë dështuar që të shënonin gol. për Kastriotin fitorja e djeshme nuk është shumë e papritur pasi kishin mposhtur bardhekaltrit e Miles edhe në mesjavë (takim i vlefshëm për Kupën e Shqipërisë).
Flamurtari sfidon Teutën për herë të dytë
Brenda pak ditësh sfidojnë njëra-tjetrën në kompeticione të ndryshme. Pas ndeshjes së Kupës së Shqipërisë (vlonjatët fituan 3-0), pritet që Teuta sot të luajë si duhet ndaj Flamurtarit. Tani në lojë është vendi i dytë në kampionat. Duke qenë se mbetën jashtë gjysmëfinaleve të kupës, të gjitha energjitë do t’i shpenzojnë në kampionat, për të zënë vendin e dytë, i cili vlen Kupat e Evropës. Për momentin janë “djemtë e detit” në këtë pozitë, me kuqezinjtë që i ndjekin një shkallë më poshtë, me dy pikë më pak.
Rezultatet
Dje
LUFTËTARI-APOLONIA 3-2
Golat: Fonseka 5′, Beqiri 75′, Lluka 85′ / Dushku 37′, Ndoni 89′
KASTRIOTI-SHKUMBINI 1-0
Golat: Kalari 67′
SKËNDERBEU-TOMORI 4-2
Golat: Lilaj 34′, Caushaj 37′, Plaku 45′ , 49′/ Elmazi 32′, Mitraj 63′
Sot
14:00 KUKËSI-LAÇI
14:00 BESA-TIRANA
17:00 VLLAZNIA-BYLISI
17:00 FLAMURTARI-TEUTA
Renditja Nd. Pikë
1 Skënderbeu 18 45
2 Teuta 17 33
3 Flamurtari 17 31
4 Tirana 17 29
5 Kastrioti 18 28
6 Kukësi 17 27
7 Vllaznia 17 26
8 Laçi 17 24
9 Bylisi 17 22
10 Besa 17 17
11 Luftëtari 18 17
12 Shkumbini 18 16
13 Tomori 18 9
14 Apolonia 18 8
Kryetari i bashkisë
Në Gramsh rrëzojnë portat
Pasi ka përfunduar takimi midis Gramshit e Mamurrasit, kryebashkiaku Dritan Bici i nervozuar nga rezultati i takimit si dhe nga gjykimi i arbitrave, ka ndërhyrë me makinën e tij tip “Mitsubishi” duke hedhur në tokë portën kryesore të stadiumit. Burime nga policia bëjnë të ditur se kryebashkiaku Bici kishte për qëllim të ndërhynte drejt dhomës në të cilën ndodheshin arbitrat. Por, sipas rregullores, disa prej policëve gjendeshin para portë së dhomës, në të cilën ishin arbitrat. Ndërkaq, në këto momente është rrezikuar edhe jeta e disa punonjësve të rendit, të cilët gjendeshin përballë makinës së kryebashkiakut. Duhet thënë se ka qenë e menjëhershme ndërhyrja e policisë, duke marrë në zotërim makinën e Bicit dhe duke e shoqëruar atë në komisariat. Për këtë veprim tepër të pahijshëm, e cila konsiderohet si vepër penale, do të nis edhe një procedim penal nga ana e policisë ndaj kryebashkiakut Bici.
Kategoria e Parë
Partizani rikthehet tek fitorja
Hasan Lika mori dje fitoren e parë si trajner i Partizanit. Në sfidën e luajtur në Yrshek, në fushën e Olimpikut, ekipi “i kuq” mposhti me rezultatin e 2-1, Burrelin. Sa i përket kronikës “të kuqtë” janë më kërkues për të shënuar golin e avantazhit. Minuta e gjashtë e takimit dhe Abazaj nuk gjuan saktë me kokë pas një krosimi në zonë. Topi shkon te Fatjon Tafaji, i cili edhe pse me portën gjysmë të boshatisur nuk arrin ta dërgojë sferën në rrjetë. Ndërkohë, në minutën e 20-të, Lala i cili është mjaft aktiv në krahun e djathtë kroson në zonë dhe Malo gjuan saktë me kokë, por është i pafat pasi topi përplaset në traversë. Nga ana tjetër, miqtë mbrohen dhe të shfrytëzojnë kundërsulmin, por hapësirat në mbrojtjen kryeqytetase janë shumë të pakta. Minuta e 33-të dhe Malo brenda zonës matjane tenton të driblojë një kundërshtar, por rrëzohet nga ky i fundit. Gjyqtari kryesor, nuk ka dyshime dhe tregon pikën e bardhë të penalltisë. Do të jetë vetë Malo i cili nuk do të gabojë dhe do të nisë festën në kampin “e kuq”. Minutat e mbetura të kësaj pjese do të kenë të njëjtën panoramë, ku Partizani sulmon, ndërsa miqtë mbrohen.
Fraksioni i dytë i lojës e gjen sërish Partizanin në sulm. Tashmë të kuqtë duan edhe golin i sigurisë, i cili do të vonojë disi. Kjo i jep mundësi kundërshtarit që të fitojë terren dhe të afrohet më shumë në portën e mbrojtur nga Adroviç, por ky i fundit në momentet kur i është kërkuar ka bërë më të mirën e tij. Ndërkohë trajneri Lika bën edhe disa zëvendësime, duke hedhur në fushë Devollin, Agastrën dhe Petron në vend të Ishkës, Malos dhe Abazajt. Nuk do të kalojë shumë dhe do të vijë goli i dytë për Partizanin. Petro rikuperon një top të bukur në sulm dhe jep një asist për Lalën, i cili më shpejtësinë e tij arrin ta kontrollojë atë. Lojtari nuk mendohet dy herë dhe gjuan shpejt, duke e ndalur sferën në rrjetë. Pas shënimit të këtij goli Partizani duket më i sigurt dhe lëshon terren. Në minutën e katërt shtesë, pas një rrëmuje në zonën e Partizanit, topi përplaset në traversë dhe më pas shkon në këmbët e Rehovës i cili gjuan saktë dhe shkurton diferencën në 2-1. Në fund të sfidës trajneri i Partizanit, Lika tha: “Kemi bërë një lojë të mirë, duke marrë tre pikë me vlera të cilat erdhën pas një jave jo shumë të qetë. Skuadra përmirësoi lojën e saj dhe kërkoi golin me shumë ngulm, duke shënuar dy herë. U ndëshkuam nga një goditje standarde e cila është e pafalshme, pasi në zonë ishin shumë futbollistë tanët, megjithatë edhe kjo erdhi për meritë të kundërshtarit i cili luajti mirë”.
Renditja Nd. Pikë
1 Lushnja 20 49
2 Mamurrasi 20 39
3 Partizani 20 37
4 Pogradeci 20 35
5 Tërbuni 20 34
6 Iliria 20 29
7 Dinamo 20 27
8 Butrinti 20 27
9 Burreli 20 26
10 Gramshi 20 24
11 Himara 20 20
12 Ada 20 19
13 Besëlidhja 20 19
14 Elbasani 20 19
15 Kamza 20 19
16 Naftëtari 20 14
Rezultatet e Javës 20
BESËLIDHJA-BUTRINTI 1-1
ADA-ELBASANI 1-0
LUSHNJA-TËRBUNI 3-1
PARTIZANI-BURRELI 2-1
KAMZA-DINAMO 2-1
NAFTËTARI-ILIRIA 1-0
HIMARA-POGRADECI 1-0
GRAMSHI-MAMURRASI 0-0
