Artan FUGA
Në ndonjë gazetë thuhet se shtatorja e Nënë Terezës qenka hequr nga sheshi me emrin e saj për t’u vendosur te ajo tjetra në Rinas, që nga ana e saj është hedhur në plehra.
Është hedhur në plehra, sepse, sikurse na thotë gazetaruci, nuk qenka në parametra të duhur estetikë…
O pika ne për këtë gazetari!!!
Do të jetë ndonjë gazetar që e ka mbaruar shkollën andej nga Universiteti i Kodrës të Diellit ose nga Momli se nuk është e mundur ndryshe…
Na ra bretku duke u thënë studentëve se nuk ka fakte sociale bruto, por vetëm fakte institucionale dhe të ndërtuara simbolikisht…
Nga ne nuk ka dalë ky gazetar i shpëlarë…që bën rolin e tellallit që jep atë që i zoti nuk e jep.
Pse mo, kështu hiqen përmendoret, më pëlqen e vë, s’më pëlqen e heq… Po ajo është vendosur me një vendim administrativ dhe duhet një vendim për ta hequr.
Kush e ka tagrin mbi kontrollin e territorit atje, komuna, Rinasi si aeroport, bashkia, qeveria? Janë ata që i marrin vendimet dhe ato vendime nuk janë estetike o gazetar, por administrative, institucionale.
Shijet estetike nuk vlejnë për të vendosur e hequr monumente o gazetar! Janë vendimet administrative që vlejnë.
Gazetari, pikaaaaaa, na thotë supozimin e tij, dhe nuk shkon të intervistojë ministren e Kulturës, kryetarin e bashkisë, të komunës apo edhe dreqin me të birin për heqjen e një monumenti dhe vendosjen e një tjetri sikur të ishim lojë yçi, damash apo nonçi. Pika o gazetar!!!
Nuk pyet kush e mori vendimin, ku është shkresa, përse u mor ky vendim, por bën supozime dhe flet si e ëma e Zeqos në majë të thanës…
Dhe ndërkohë Ministria e Kulturës, bashkia, komuna, a kush e ka në kompetencë hesht dhe flet shumë me heshtjen e saj… Hidhen në plehra monumente dhe dhjetëra nëpunës që paguhen me taksat tona, nuk na japin një shpjegim e na tregojnë një vendim.
O pika ne!!!