Koha është flori për Superioren këtë sezon, pas bojkotit. Pas ndeshjeve të mesjavës, tashmë është radha për sfidat e radhës për llogari të javës së pestë të kampionatit elitar të futbollit në vend.
Tre ndeshje luhen prej orës 13:45 dhe në fushë do të zbresin kampionët në fuqi të Tiranës, që luajnë në Kamëz kundër Kastriotit që ka surprizuar në javët e para dhe renditet në vendin e dytë në kampionat.
Sfidë po ashtu interesante luhet në Ballsh, ku vendasit që nuk e kanë provuar shijen e fitores presin Teutën e mbërthyer pas barazimeve në shtëpi. Sot Laçi ka mundësinë të provojë shijen e fitores, me Stavri Nicën në krye, kundër Apolonisë.
Më pas vijnë ndeshjet e orës 16:45 dhe vëmendjen e merr një tjetër derbi i veriut.
Vllaznia-Kukësi është një ndeshje për t’u parë, duke pasur parasysh që shkodranët kanë një ecuri fantastike në këtë fillim sezoni.
Kukësi u çlirua në mesjavë, pas fitores me Laçin dhe do kërkojë të marrë sërish pikë.
Ndeshje tjetër që luhet sot është ajo mes Partizanit dhe Skënderbeut që pikët e vetme i ka marrë në ndeshjet jashtë. Të kuqtë shikohen si favoritë.