Skënderbeu shpresonte në përgjysmimin e dënimit të UEFA-s nga Gjykata Federale në Zvicër, por një gjë e tillë nuk do të ndodhë. Klubi shqiptar ka zbuluar vendimin e marrë ditën e mërkurë pas apelimit, teksa është lënë në fuqi vendimi i marrë më parë nga CAS.
Skënderbeu u dënua fillimisht nga UEFA me 10 vjet përjashtim nga kupat e Europës, dhe me 1 milionë euro gjobë, me akuza për manipulim të rezultateve në Champions dhe në Ligën e Europës, në turet eliminatore dhe në fazën e grupeve.
Njoftimi nga Skënderbeu
Sot, më datë 12 Gusht 2020, KF Skënderbeu-t ju bë me dije Vendimi i Gjykatës Federale Zvicerane në lidhje me rekursin e kryer ndaj Vendimit të CAS-it datë 12 Korrik 2019.
Pavarësisht argumenteve të pakundërshtueshme të paraqitura në proçes, trupa gjykuese e përbërë nga 5 anëtarë, përmes një vendimarrje me shumicë të thjeshtë votash, 3 vota pro dhe 2 kundra, vendosi rrëzimin e rekursit të kryer nga KF Skënderbeu, duke konfirmuar vendimin e mëparshëm të CAS-it.
Në momentin aktual, KF Skënderbeu po shqyrton të gjitha mundësitë për një ankim të mëtejshëm në Gjykatën Europiane për të Drejtat e Njeriut, pasi në asnjë mënyrë nuk mund të konformizohet me një vendim i cili, në çmimin tonë, cënon rëndë parimet e të drejtës për një proçes të rregullt ligjor. Për këtë, informacione të mëtejshme në lidhje me përmbajtjen e vendimit në fjale do të bëhen publike, pasi të jenë kryer të gjitha vlerësimet e rastit.
Pavarësisht efekteve tejet të rënda që ky vendim ka, KF Skënderbeu do të vezhdojë rrugën e tij drejt arritjes sërish të sukseseve historike të mëparshme, të cilat ende sot shërbejnë si model e frymëzim për futbollin Shqipëtar. Puna vazhdon!
