Në qytetin e Nju Jorkut, autoritetet e shëndetit janë duke ndërtuar një morg të përkohshëm për t’u përballur me një numër potencialisht të lartë të viktimave të shkaktuara nga koronavirusi.
Zyra e Ekzaminuesit Kryesor Mjekësor është shprehur se strukturat frigoriferike janë duke u vendosur në Manhattan dhe si funksion do të kenë ofrimin e kapaciteteve shtesë në rast se morgjet e qytetit do të mbushen, shkruan abcnews.al
Kamionët-frigoriferë janë parkuar jashtë spitalit Bellevue, ndërsa mjekët e përshkruajnë situatën si “apokaliptike”.
Një zëdhënës i kryebashkiakut Bill de Blasio është shprehur se masat po merren në mënyrë që qyteti të jetë i përgatitur për çdo lloj situate që mund të vijë si pasojë e krizës së krijuar nga epidemia e koronavirusit.
Kjo Zyrë e ka përdorur këtë taktike me morg të përkohshëm edhe herë të tjera në të shkuarën, përfshirë këtu edhe në tragjedinë që ndodhi më 11 shtator të 2001.
Prania e kamionëve ka krijuar edhe panik mes qytetarëve pasi vendosja e tyre tregon që numri i viktimave pritet të jetë i madh.
Deri më tani, sipas të dhënave të publikuara në worldmeters, Nju Jorku mbetet shteti më i prekur nga koronavirusi në SHBA me 33,013 raste të konfirmuara. Deri më tani, numri i viktimave është 366.
