Bllokimi i pusetave të ujërave të zeza është një nga shqetësimet kryesore të banorëve në zonën e rrugës së Thesarit. Ata ankohen për infeksionet që mund të përhapen prej tyre dhe dëmet materiale në pallatin e tyre.
Rruga e Thesarit u riparua vetëm dy javë më parë, por askush nuk u kujdes për pusetat e ujërave të zeza.
Në këto kushte kur Bashkisë i plasin ujrat, qytetarët ankohen për rrezikun e përhapjes së infeksioneve dhe erën e keqe.
“Më këmbë në hale kalojmë.”
“Nuk kemi kryetar bashkie, as administrator.”
Shqetësimi i banorëve nuk mbetet vetëm në rrugën e cila pushtohet nga ujërat e zeza, por edhe sepse këto ujëra derdhen në bodrumin e pallatit.
“Ja si është bërë kjo këtu, e gjitha shkon te garazhet brenda.”
Si me kapak, si pa kapak, pusetat në zonën e rrugës së Thesarit nuk kryejnë procesin e tyre. Uji rrjedh përgjatë të gjithë këtij segmenti. Përmbytja e vazhdueshme është vetëm një prej shumë shqetësimeve të banorëve.
Rrugët pa infrastrukturë dhe plerat e përhapura kudo janë të tjera probleme me të cilat hasen çdo ditë banorët./OraNews