Standard.al

Rama nuk ndal sulmet ndaj Haradinajt/ Ka sharë liderat kosovarë duke quajtur njërin gënjeshtar, njërin hipokrit…

0

Ramushi e ka kthyer shpifjen në pushkë. Është ky reagimi i Kryeministrit Edi Rama lidhur me akuzat e Kreut të Qeverisë së Kosovës, Ramush Haradinaj, përsa i takon qëndrimit dhe rolit që ka pasur Rama në projektin për ndarjen e Kosovës.

Mbrëmjen e djeshme në emisionin “Open”, Haradinaj ka ripërsëritur akuzat ndaj Ramës, ndërsa ky i fundit në një reagim për Top Channel, shprehet se Ramushi ktheu shpifjen në pushkë që kur ka lënë pushkën.

“Ramushi e ka kthyer shpifjen në pushkë qëkur ka lënë pushkën! Por nëse për pushkën ia kam bëre të gjitha nderimet e mundshme dhe të merituara, për shpifjet nuk mund t’i bëj asgjë tjetër përveçse ta ftoj në gjykatën e Kosovës që t’u dalë për zot atyre që ka nxjerrë nga goja!

Sepse ndryshe nga Ramushi dhe nga ai soj politikanësh qe s’kanë fijen e respektit as për fjalën, as për të vërtetën, as për publikun, unë nuk ulem dot në nivelin e shpifësit publik për ta luftuar berllogun me berllog! Pafytyrësi nuk është të shkosh në gjykatë për t’u mbrojtur nga një shpifës që të ka cënuar publikisht dinjitetin, po të përdoresh kanalet e komunikimit publik për të shpifur në mënyrë të përsëritur!

Nuk është akt i turpshëm t’i nënshtrohesh gjykimit të drejtësisë si viktimë e një shpifësi që të sulmon si tradhtar të kombit me fabrikime të ulëta, po turp është të bësh agresorin ndaj dikujt tjetër për të manipuluar opinionin publik duke fabrikuar gjëra krejt të paqena!

E vërteta është se unë kam dashur ta ndaj Kosovën, po aq sa ç’ka dashur Ramushi ta ndajë Princ Harryn nga Familja Mbretërore! Shkurt fjala, komandanti i djeshëm i UÇK-se Ramush Haradinaj, e ka merituar dhe do ta ketë për gjithë jetën respektin tim, për gjithçka i ka dhënë kauzës së lirisë së Kosovës, ndërsa politikani i sotëm Ramush Haradinaj, meriton vetëm keqardhjen time për bërllogun politik e gjuhësor ku ushtron veprimtarinë dhe pushtetin e tij.

Është dëshpëruese kur sheh se si politika qorre e Ramushit e ka dëmtuar keq Kosovën në sytë e miqve të saj të mëdhenj dhe i ka dhënë Serbisë një avantazh te vazhdueshëm në arenën ndërkombëtare në raport me Kosovën. Uroj që padia ime të vlejë për t’u hapur sadopak sytë atyre që kanë rënë pre e berllogut politik e mediatik të Prishtinës e të Tiranës”, shprehet Edi Rama.

Mbrëmjen e së enjtes, Haradinaj e quajti Ramën një hajgarexhi i cili me padinë kundër tij e ka quajtur një akt të turpshëm.

“Më lejoni t’iu them diçka. A ju duket mirë ju që Rama në takime me ndërkombëtarët ka sharë liderat kosovarë duke quajtur njërin gënjeshtar, njërin hipokrit dhe njërin neo-marksist.

Ju duket mirë që Rama shan liderat e Kosovës”, tha Haradinaj.

Leave A Reply

Your email address will not be published.

This site uses Akismet to reduce spam. Learn how your comment data is processed.