Policia kroate në bashkëpunim të ngushtë me autoritetet gjermane dhe ato çeke, por edhe me EUROPOL, ka goditur një grup kriminal, i cili mbahej nën hetim për evazion fiskal, pastrim parash, falsifikim dokumentesh dhe për mashtrim.
Sipas njoftimit të shpërndarë në faqen zyrtare nga EUROPOL, bëhet me dije se grupi tregtonte automjete luksoze përmes disa ndërmarrjeve në vende të ndryshme të BE-së, të cilat dyshohen se vepronin ilegalisht.
Grupi kriminal, që drejtohej nga një 48-vjeçar, falsifikonte dokumente dhe fatura për të shmangur taksat dhe detyrimet e akcizës dhe për të ofruar shërbime të pastrimit të parave për kriminelët dhe grupet e tjera. Policia e Kroacisë ka ngritur dyshime të forta ndaj shtetasit kroat, por edhe ndaj 10 personave të tjerë që janë pjesë e këtij grupi, i cili funksiononte me ‘rregullat e veta’ duke sfiduar ligjin me anë të mashtrimit dhe fshehjes. Këta persona tashmë janë venë në pranga deri në zbardhjen e plotë të veprimtarisë së tyre.
Hetimi në vazhdim nga policia kroate pret që të paraqiten akuza të reja për të arrestuarit, ndërsa janë sekuestruar një sasi e madhe parash dhe makina luksoze.
