Gjykata e Lartë ka zgjidhur çështjen e ekstradimit të katër personave afatet e të cilëve rrezikoheshin për shkak të mungesës së trupës gjykuese.
Dy gjyqtarë të deleguar dhe anëtari i vetëm i mbetur në Gjykatën e Lartë Ardian Dvorani i kanë hapur rrugë ekstradimit të shtetasve Valentina Dushku, Besnik Leka, Robens Berberi dhe Hajri Seferi.
Trupa gjykuese ka vendosur të rrëzojë rekursin e të pandehurve duke i hapur rrugë ekstradimit të katër shtetasve drejt Italisë.
Pas zgjidhjes së ngërçit të ekstradimeve të cilëve iu skadonte afati, pritet të ndiqet procedura për dorëzimin e të kërkuarve tek autoritetet e huaja.
Pasi morën pjesë në seancën e Gjykatës së Lartë, dy gjyqtarët e caktuar përkohësisht Albana Boksi dhe Sokol Binaj janë kthyer në detyrat e tyre të mëparshme në Gjykatën e Apelit për Krimet e Rënda.
Për shkak të bllokimit të çështjes së ekstradimeve në Gjykatën e Lartë Këshilli i Lartë Gjyqësor ndërhyri duke caktuar dy gjyqtarët Boksi dhe Binaj për të shqyrtuar katër çështjet e ekstradimeve.
Ndërkohë Komisioneri Publik ka apeluar vendimin e Komisionit të pavarur të kualifikimi për lënien në detyrë të prokurores Manjola Kajana, kandidate për Strukturën e Posaçme Anti Korrupsion.
Sipas Komisionerit, hetimi i Komisioni të Pavarur nuk ka qenë i plotë. Prokurorja e krimeve të rënda u konfirmua në detyrë me 19 korrik, pasi rezultoi pa probleme në kriterin e pasurisë, atë të figurës dhe e aftë profesionalisht.
