Standard.al

‘Sulmi mbi Jasharajt në të katër anët’. Rrëfim tronditës, qëndresa heroike përballë artilerisë serbe!

0

Sulmi mbi Jasharajt në të katër anët nis rreth orës gjashtë të mëngjesit. Në shtëpi ndodheshin pothuajse tërë anëtarët e familjes. Sulmi mbi Jasharajt dhe qëndresa heroike e tyre zgjat tri ditë: më 5, 6 dhe 7 mars 1998.

Më 5 mars 1998, në orët e hershme, forca të mëdha të policisë serbe kishin mësyrë Prekazin. Një pikë zjarri, e stacionuar që herët në lokacionin e fabrikës së municionit, që ishte në afërsi të shtëpisë së Jasharajve, ishte përforcuar me mjete të rënda artilerike.

Gjatë këtyre tri ditëve, vriten Adem dhe Hamëz Jashari dhe mbi 50 anëtarë të familjes. Tri shtëpitë e tyre u shkatërruan në masë të madhe. Muret e goditura nga artileria serbe, lanë pasoja të mëdha.

Megjithatë ato nuk u shembën.

Kjo rezistencë tashmë po vazhdon luftën me kohën. Këto kulla po rrezikojnë rënien e dytë, pasi institucionet prej përfundimit të luftës që 17 vite, nuk kanë ndërhyrë në restaurimin e tyre.

Drejtori i Agjencisë për Mbrojtjen e Memorialeve të Luftës, Idriz Blakaj, thotë për lajmi.net se nëse vazhdon kjo neglizhencë e institucioneve, kullat janë në rrezik të rrënohen nga dëmtimet.

“Një ballkon veç është rrënuar, ndërsa muret janë çarë dhe ky rrezik po vazhdon ta cënojë qëndrueshmërinë e kullave”, thotë Blakaj.

Ai tregon se Agjencioni që e drejton, ka projektuar restaurimin e tri kullave të Jasharajve, një të Sahit Jasharit dhe bunkerit të ish-luftëtarëve të UÇK-së.

“Projekti kap koston prej pesë milion eurove. Tenderi mund ta rrisë ose ta ulë këtë shumë, por e rëndësishme është që paratë të ndahen. Po shpresojmë që me rishikimin e buxhetit të bëhet një gjë e tillë”, deklaron Blakaj për lajmi.net

Blakaj shton se kullat nuk do të mbyllen për vizitorë, ndërkaq familja Jasharaj sipas tij, nuk përzihet në këto punë pasi kullat tashmë janë shpallë zonë kombëtare me interes të veçantë.

Leave A Reply

Your email address will not be published.

This site uses Akismet to reduce spam. Learn how your comment data is processed.