Yannis Behrakis ishte njëriu i cili i tregoi mbarë botës luftën e Kosovës përmes shkrepjeve të cilat janë përjetësuar tashmë në histori. Një nga shkrepjet më emocionale dhe më të famshme të tij ishte ajo e Mustafa Xhajës nga Mitrovica, i cili shihej së bashku me fotografitë e dy fëmijeve të tij të vrarë nga forcat ushtarake serbe më 1999.
Mësohet se është ndare nga jeta shefi i fotografëve të agjencisë prestigjoze të lajmeve Reuters, Yannis Behrakis.
Reporteri ndërroi jetë në moshën 58 vjeçare. Ai ishte fitues i shumë çmimeve prestigjoze në gazetari. Në vitin 2016 ai fitoi çmimin Pulitzer për mbulimin e krizës së refugjatëve.
Redaktorja e përgjithshme e lajmeve në Reuters, Dina Kyriakidou Contini tha se “fotografitë e tij janë portrete, vepra arti, por ishte ndjeshmëria ajo që e bëri atë një fotoreporter të madh”.
Motoja e Yannis Behrakis ishte: “Një fotografi mund të ndryshojë botën dhe ta bëjë më të drejtë”.