“Nuk kam punuar kurrë për Rusinë dhe ju e dini përgjigjen më mirë se kushdo. Eshtë turp që e bëni këtë pyetje. Eshtë një mashtrim i madh” u tha presidenti amerikan gazetarëve. Komentet e tij erdhën pas raportit se FBI hetoi dyshimet mbi lidhjen e Trump me Rusinë dhe më pas ai shkarkoi drejtorin e Byrosë në 2017.
Raporti shkruan se Trump kishte parandaluar edhe ndihmësit e tij që të dinin përmbajtjen e bisedave që ka pasur me Putin gjatë samiteve të ndryshme. “Eshtë një lajm shumë i rremë. I kam pasur të gjithë në të gjithë takimet me liderë të ndryshëm”. “Kam marrëdhënie shumë të mira me të gjithë dhe kjo është një gjë e mirë dhe jo një gjë e keqe” deklaroi presidenti amerikan.
Trump është edhe në qendër të hetimit të udhëhequr nga prokurori special Robert Mueller që po heton akuzat se kremlini ka ndikuar në zgjedhjet presidenciale 2016.
